Чарговы плыт зь беларускімі кантрабанднымі цыгарэтамі, які плыў па Дзьвіне, выявілі 26 красавіка ў Краслаўскім краі Латвіі — у Піедруйскай воласьці, якая мяжуе зь Верхнядзьвінскім, Мёрскім і Браслаўскім раёнамі Віцебскай вобласьці Беларусі.
Дзяржаўная памежная ахова Латвіі паведаміла, што ў час патруляваньня нарад заўважыў падазроны аб’ект, які плыве па рацэ. Выкарыстоўваючы маторную лодку, памежнікі спынілі плыт і зьнялі зь яго «восем простакутных пакункаў, абгорнутых у чорную поліэтыленавую плёнку», піша са спасылкай на памежнікаў «Позірк».
Паведамляюць аб канфіскацыі 50 000 цыгарэт NZ Gold і 30 000 цыгарэт Queen Superslim зь беларускімі акцызнымі маркамі.
Знаходку перадалі паліцыі. Тая адкрыла чарговую справу ў межах XIX главы Крымінальнага закону (злачынствы супраць нацыянальнай эканомікі).
Гэта ўжо трэці падобны выпадак у красавіку. 10 красавіка памежнікі выцягнулі зь Дзьвіны покрыўкі з трактарных апонаў, у якіх транспартаваліся 66 120 цыгарэт NZ Gold, 16 красавіка — плыт з 62 060 цыгарэт NZ Gold Superslim зь беларускімі акцызнымі маркамі.
Форум