Тацяна Ерахавец апублікавала ў Instagram фрагмэнт выказваньня Разаліі і таксама падзякавала ёй за магчымасьць стаць часткай яе праекту.
«Разалія — цудоўная сьпявачка, артыстка, аўтарка песень і яшчэ лепшы чалавек. Я змагла на ўласныя вочы пераканацца ў яе велізарным таленце і тым, як старанна яна працуе і зь якой павагай і сьціпласьцю падыходзіць да ўсяго працэсу навучаньня. Я вельмі ўдзячная за тое, што ўдзельнічаю ў гэтым неверагодным праекце», — напісала Тацяна Ерахавец.
Тацяна Ерахавец — выпускніца Менскай харэаграфічнай школы, у мінулым — прыма менскага Вялікага тэатра. У 2002 годзе ў Гішпаніі яна адкрыла ўласную балетную школу.
Цяпер Разалія з канцэртаў у Барсэлёне пачала свой усясьветны тур Lux. Ёй трэба было навучыцца танцаваць для пастаноўкі пад песьню Porcelana. Пастаноўкай займаўся францускі калектыў La Horde з Марсэлю, а Тацяна Ерахавец рыхтавала да яе сьпявачку.
Разалія на канцэрце ў Барсэлёне 18 красавіка падзякавала Тацяне Ерахавец са сцэны за дапамогу ў асваеньні «складанай і неймаверна прыгожай дысцыпліны». «Я хачу падзякаваць усім вам, хто быў маімі настаўнікамі», — сказала яна.
Разалія — усясьветна вядомая гішпанска-каталёнская сьпявачка, якая выконвае і сама піша песьні, у якіх пасьпяхова спалучае фляменка з альтэрнатыўнымі жанрамі.
Прэмію Grammy яна атрымала за альбомы «Motomami», зроблены ў 2023 годзе, і «El Mal Querer» — у 2020 годзе. Лацінскую прэмію Grammy яна атрымлівала кожны год, пачынаючы з 2018 году.
У лістападзе 2025 году Разалія выдала свой чацьвёрты студыйны альбом Lux, які яна запісала з London Symphony Orchestra. Крытыкі назвалі яго сьмелым расшырэньнем межаў поп-музыкі і прызналі яго адным з самых амбіцыйных праектаў 2025 году. Цяпер з гэтым альбомам сьпявачка адправілася ва ўсясьветнае турнэ.
Форум