Як паведаміла агенцтва BNS, Януіціса асудзілі на 7 гадоў зьняволеньня, а Бялецкую — на 6,5 гадоў. Суд залічыў ім у пакараньне больш за два гады, якія яны правялі пад вартай і арыштам.
Справу разглядалі ў закрытым рэжыме, судзьдзя Эдзіта Лапінскене абвясьціла толькі пачатковую і апошнюю частку выраку.
Цягам 20 дзён яны могуць абскардзіць вырак.
Суд пастанавіў канфіскаваць грашовыя сродкі асуджаных, а таксама прадметы, якія мелі дачыненьне да справы — тэлефоны і аўтамабіль.
Згодна з матэрыяламі справы, у траўні 2022 году грамадзяне Літвы Міндоўг Януіціс і Тацяна Бялецкая накіраваліся ў Менск, дзе праз пасярэдніка дамовіліся аб кантактах і далейшай супрацы з прадстаўнікамі вайсковых структур Беларусі.
Паводле сьледчых, пасьля гэтай сустрэчы і да свайго арышту яны выконвалі заданьні Галоўнага выведнага ўпраўленьня Генэральнага штабу Міністэрства абароны Беларусі.
У абмен на грашовую ўзнагароду яны ў Літве і Латвіі зьбіралі і перадавалі інфармацыю, якая цікавалі спэцслужбы Беларусі.
Сьледчыя адзначылі, што сабраная імі інфармацыя не зьяўляецца сакрэтнай, але зьяўлялася каштоўнай як для ўзброеных сіл замежных дзяржаў пры падрыхтоўцы плянаў ваеннай агрэсіі, так і для іншых захадаў, накіраваных супраць Літвы.
Форум