Ужо праз гадзіну пасьля адкрыцьця ўчасткаў яўка перавысіла 3%, а да 9 раніцы наблізілася да 17% — гэта самы высокі паказчык для гэтага часу ў сучаснай гісторыі краіны. На мінулых выбарах да 9 раніцы прагаласавалі крыху больш за 10% выбаршчыкаў.
У выбарах бяруць удзел пяць палітычных сіл, кожная зь якіх павінна пераадолець пяціпрацэнтны бар’ер, каб прайсьці ў парлямэнт. Паводле апытаньняў, апроч дзьвюх найбуйнейшых партый, шанцы прайсьці ёсьць толькі ў скрайнеправай «Нашай айчыны».
Галоўная барацьба разгортваецца паміж кіруючай партыяй «Фідэс» на чале з 62-гадовым прэмʼер-міністрам Віктарам Орбанам і апазыцыйнай правацэнтрысцкай партыяй «Тыса» пад кіраўніцтвам 45-гадовага Петэра Мадзяра. Незалежныя апытаньні прадказваюць перамогу «Тысы», у той час як блізкія да ўлады аналітыкі мяркуюць, што «Фідэс» захавае парлямэнцкую большасьць, а Орбан зможа застацца ва ўладзе яшчэ на чатыры гады, падоўжыўшы свой агульны прэмʼерскі тэрмін да 20 гадоў.
Пэтэр Мадзяр — былы паплечнік Орбана, перайшоў у апазыцыю ў 2024 годзе. Яго кампанія засяроджана на ўнутраных праблемах — стане аховы здароўя, транспарце і барацьбе з карупцыяй, а таксама на збліжэньні з Брусэлем, які Орбан вінаваціць ва ўсіх бедах Вугоршчыны ледзь не адразу пасьля перамогі на выбарах у 2010 годзе.
У сваёй кампаніі Мадзяр назваў выбары «рэфэрэндумам», які павінен паказаць, ці працягне Вугоршчына рух у бок Расеі пад кіраўніцтвам Орбана ці вернецца на шлях эўрапейскай дэмакратыі.
Форум