Раніцай 9 красавіка сілавікі прыйшлі ў менскі офіс знанай архітэктурнай кампаніі ZROBIM architects. Паводле інфармацыі «Люстэрка» ад дзвюх не зьвязаных паміж сабой крыніцаў, затрыманыя ўсе супрацоўнікі, якія знаходзіліся на месцы, — гэта каля 50 чалавек. Прычына пакуль невядомая.
Сярод затрыманых — адзін з заснавальнікаў, Андрэй Макоўскі.
Таксама паведамляецца, што на гэты момант недаступны працоўны сэрвэр кампаніі, праз які ў тым ліку працуюць супрацоўнікі на аддаленцы.
Прычыны цікавасьці сілавікоў да адной з самых вядомых і пасьпяховых архітэктурных студый Беларусі пакуль застаюцца невядомымі.
ZROBIM architects — беларуская архітэктурная студыя, заснаваная ў 2011 годзе Андрэем Макоўскім (Андрусь Bezdar) і Аляксеем Караблёвым. Кампанія вядомая сваімі праектамі ў сучаснай архітэктуры і дызайне, працуе як у Беларусі, так і за мяжой.
Студыя актыўна вядзе сацыяльныя сеткі і блог, дзе дзеліцца новымі праектамі і навінамі. Кампанія рэгулярна атрымлівае прэстыжныя міжнародныя ўзнагароды. Гэтак, летась іх праект школы ў прысталічным мікрараёне Новая Баравая стаў пераможцам IIDA Global Excellence Award 2025 у катэгорыі «Адукацыя».
Форум