На плятформе Zrzutka запусьцілі збор грошай на альбом сьвяточных праваслаўных сьпеваў на беларускай мове «Праваслаўны Вялікдзень». Аўтары стварылі альбом з 36 запісаў велікодных сьпеваў па-беларуску і падрыхтавалі ноты, а цяпер працуюць над новымі нотнымі зборнікамі.
Аўтары праекту — беларуская праваслаўная супольнасьць капліцы сьв. Рыгора Перадзэ ў Варшаве (Польская аўтакефальная праваслаўная царква). Ад сакавіка 2023 году там служаць Боскую літургію па-беларуску і разьвіваюць царкоўныя сьпевы на беларускай мове.
У зацікаўленых асобаў, якія хацелі бы далучыцца да збору грошай на выданьне альбому, ёсьць магчымасьць паслухаць прыклады запісаў і спампаваць поўны камплект нотаў. Гэта можна зрабіць і праз QR-кодна здымку.
Альбом «Праваслаўны Вялікдзень» (у дзьвюх частках) выйдзе на стрымінгавых плятформах ужо ў красавіку.
«Мы б хацелі, каб і нашыя сябры з Заходняй царквы таксама далучыліся да бізантыйскага досьведу сьвяткаваньня Вялікадня, таму, спадзяемся, да 5 красавіка альбом пройдзе мадэрацыю», — адзначылі ягоныя аўтары.
Таксама яны расказалі, за якія ахвяраваньні можна будзе атрымаць іх прадукцыю:
«У Варшаве на прыходзе сьв. Рыгора Перадзэ (Warszawa, ul. Lelechowska 5) можна атрымаць паштоўку-вокладку велікоднага альбому з QR-кодам доступу да ўсіх нот і запісаў за ахвяраваньне. Мінімальнае ахвяраваньне — 35 злотых (прыкладна 9 эўра). Вы ахвяруеце на месцы — мы аддаем на месцы.
Пры ахвяраваньні ад 200 злотых (прыкладна 50 эўра) мы вышлем гэтую паштоўку ў любую краіну, куды толькі магчымая паштовая дастаўка з Варшавы.
Пры ахвяраваньні ад 600 злотых (прыкладна 140 эўра) мы зробім для Вас флэшку, запішам туды велікодны альбом з нотамі і вышлем поштай».
На што пойдуць сродкі
Ахвяраваньні ідуць на разьвіцьцё беларускамоўнага праваслаўнага набажэнства, адзначае супольнасьць. У прыватнасьці, грошы пойдуць на:
- адаптацыю літургічных твораў пад беларускую мову (аплата працы музыкаў і кампазытараў);
- стварэньне электронных нот (аплата апраграмаваньня);
- музычную і моўную карэктуру;
- дызайн і вёрстку нотных зборнікаў;
- друк і распаўсюд.
Да канца 2027 году парафіяне плянуюць таксама выдаць нотны зборнік літургій сьв. Яна Залатавуснага і сьв. Васіля Вялікага і велікодны нотны зборнік. У будучыні ўсе ноты, створаныя ў межах гэтага праекту, будуць выкладзеныя онлайн у адкрытым доступе.
Акрамя таго, аўтары праекту далей плянуюць запісваць сьпевы, а да іх ноты да Раства Хрыстовага і іншых вялікіх хрысьціянскіх сьвятаў.
Форум