Усяго прайшлі больш за 3 тысячы мітынгаў і дэманстрацый ва ўсіх 50 штатах. Акцыі адбыліся таксама па-за межамі ЗША ў шэрагу буйных гарадоў сьвету.
Паводле арганізатараў, у акцыях пад лёзунгам «Без каралёў» агулам прынялі ўдзел да 8 мільёнаў чалавек.
Арганізатары і ўдзельнікі мітынгаў пратэставалі супраць таго, што яны называюць аўтарытарнымі тэндэнцыямі адміністрацыі Трампа, супраць дзеяньняў міграцыйнай службы ICE, росту кошту жыцьця, таксама гучалі патрабаваньні сацыяльнай справядлівасьці і лёзунгі супраць вайны з Іранам і ў падтрымку Палестыны.
Найбуйнейшай акцыяй стала дэманстрацыя ў Мінэапалісе, штат Мінэсота. У гэтым штаце падчас рэйдаў ICE мінулай зімой былі забітыя двое актывістаў — грамадзяне ЗША. Пасьля рэйды для выяўленьня нелегальных імігрантаў у горадзе фактычна былі згорнутыя, што супернікі Трамп называюць сваёй перамогай.
На акцыю ў суботу, паводле ацэнак, прыйшлі дзясяткі тысяч людзей, арганізатары кажуць пра 200 тысяч. Выступілі сьпявак Брус Спрынгстын, актрыса Джэйн Фонда, губэрнатар штата Цім Уолтц і сэнатар Берні Сандэрс. Дзеячы культуры і вядомыя палітыкі-дэмакраты ўзялі ўдзел у акцыі ў Нью-Ёрку.
У Белым доме заявілі, што дэманстрацыі былі арганізаваныя сеткамі левых актывістаў, шчодра фінансуюцца супернікамі Трампа, і што яны зьяўляліся адлюстраваньнем «Сындрому вар’яцкай зацыкленасьці на Трампе», а не рэальных праблем.
Не абышлося без інцыдэнтаў. Як піша BBC, у Лос-Анджэлесе затрымалі двух чалавек за напады на сілавікоў, таксама паведамляецца аб «шматлікіх арыштах» пасьля адмовы разысьціся. У Даласе – сутычкі і затрыманьні пасьля зрыву маршу.
Форум