«Масква актыўна стварае перадумовы для пераезду ляяльных грамадзян у Беларусі — і робіць гэта сыстэмна, з разьлікам на пэрспэктыву. Мова ідзе пра памяркоўных прадстаўнікоў расейскага грамадзтва, а не прапуцінскіх актывістаў. Менавіта яны маюць шанец пасьпяхова асымілявацца на чужой, але не варожай тэрыторыі і пры патрэбе ператварыцца на крытычную масу „карэннага расейскага насельніцтва ў Беларусі“ — той, што будзе патрабаваць абароны праз неабходнасьць вывучэньня беларускай мовы. Сцэнар вядомы, інструмэнтар таксама», — адзначаецца ў паведамленьні выведкі.
У замежнай выведцы Ўкраіны мяркуюць, што Расея ня можа афіцыйна і прымусова, як гэта рабілася ў СССР, перасяляць частку свайго насельніцтва.
«Таму абралі іншы шлях: у РФ штучна ствараюць непрымальныя ўмовы для пражываньня памяркоўных расейцаў, якія гатовыя да пераезду, але не плянуюць эміграваць у далёкае замежжа. Мэханізм просты: дзяржава пасьлядоўна і мэтадычна робіць жыцьцё лібэралаў нясьцерпным і не пакідае ім іншага выбару, апроч выезду, але выезду кантраляванага і ў зручным для Масквы кірунку», — мяркуюць украінскія выведнікі.
У сувязі з гэтым замежная выведка Ўкраіны нагадала аб ухваленьні ў Расеі закону аб увядзеньні крымінальнай адказнасьць за адмаўленьне генацыду савецкага народу. Паводле ўкраінскіх выведнікаў, гэты дакумэнт цалкам упісваецца ў агульную канву ціску на лібэральных грамадзян.
Паралельна, адзначаецца ў паведамленьні, магутнымі міграцыйнымі чыньнікамі выступаюць блякаваньне інтэрнэту і сацыяльных сетак, пакараньні за «фэйкі» пра расейскую армію, безальтэрнатыўнасьць выбараў і іншыя пасьлядоўны недэмакратычныя працэсы.
«У Беларусі цяпер усё гэта адчуваецца ня так востра. Але пакуль. Таксама апошнім часам пераезд у РБ актыўна прасоўваецца ў сацыяльных сетках лібэральным расейцам як новае месца пражываньня. Нешта на ўзор рэспублік Балтыі ў часы СССР — адносна больш свабодна, адносна сваё і дастаткова блізкае, каб не адчуваць сябе эмігрантам», — патлумачылі ў Службе замежнай выведкі Ўкраіны.
Паводле ўкраінскай выведкі, Масква такім чынам вырашае адразу дзьве задачы: пазбаўляецца грамадзян, якія пакуль здольныя думаць, і мэтадычна цэмэнтуе на будучыню свой уплыў на Беларусь.
Сапраўды апошнім часам у сацыяльных сетках актыўна абмяркоўваюць магчымы масавы пераезд расейцаў у Беларусь, асабліва пасьля блякаваньня там Telegram і абмежаваньняў інтэрнэту. Беларусы абураюцца, што ўсходнія суседзі няправільна называюць краіну — «Белоруссией», што хочуць разьлічвацца расейскімі рублямі, карыстацца sim-картамі расейскіх мабільных апэратараў бяз роўмінгу, «размаўляюць на 25% гучней» і агулам паводзяць сябе як гаспадары, а не як госьці.
У пачатку сакавіка камісія ўраду Расеі па заканапраектнай дзейнасьці ўхваліла ўнясеньне на разгляд Дзяржаўнай думы праекту закону, што прадугледжвае выкарыстаньне вайскоўцаў для абароны расейскіх грамадзян, арыштаваных за мяжой.
Форум