25 сакавіка ў будынку Эўрапярлямэнту ў Брусэлі дэпутаты вывесілі вялікі бел-чырвона белы сьцяг у гонар Дня Волі. Гэта адбылося з ініцыятывы дэлегацыі Эўрапарлямэнту для сувязяў зь Беларусьсю.
Старшыня Эўрапарлямэнту Рабэрта Мэтсала ў прамове да Эўрапарлямэнту сёньня сказала з нагоды Дня Волі:
«Для мільёнаў беларусаў гэты дзень стаў магутным сымбалем супрацьстаяньня рэпрэсіўнай дыктатуры. І мы карыстаемся гэтай магчымасьцю, каб зноў падкрэсьліць нашую падтрымку ўсіх беларусаў, якія змагаюцца за свабодную і дэмакратычную краіну».
Зь віншаваньнем у супольным звароце да беларусаў таксама зьвярнуўся шэраг дэпутатаў Эўрапарлямэнту — старшыня Камітэту ў замежных справах Дэйвід Макалістэр, старшыня Падкамітэту ў правах чалавека Мунір Сатуры, старшыня дэлегацыі для сувязяў зь Беларусьсю Малгажата Гасеўская, яе намесьнікі ў гэтай дэлегацыі Томас Тобэ і Міхал Кабоска, сталы дакладчык Беларусі Гельмут Бранштэтэр.
«Дзень Волі — гэта значна больш, чым проста гістарычная падзея, гэта жывое сьведчаньне нязьменнага імкненьня нацыі да дзяржаўнасьці, годнасьці і самавызначэньня. Ён увасабляе бачаньне Беларусі, якое папярэднічала і перажыло савецкую эпоху і працягвае натхняць пакаленьні ў іх імкненьні да свабоды», — гаворыцца ў звароце.
Форум