Тры жывёліны загінулі. Пасажыры і брыгада цягніка не пацярпелі, перадае rmf24.pl.
У Польшчы ўсё часьцей зубры выходзяць зь лясоў на палеткі і дарогі. Рэгіянальная дырэкцыя дзяржаўных лясоў у Беластоку адзначыла, што ў Белавескай пушчы зубрам ужо цесна — іх каля 1200, што амаль утрая больш за «ёмістасьць асяродзьдзя». Праз гэта зубры і выходзяць з пушчы ў пошуку ежы і жыцьцёвай прасторы.
Напярэдадні аварыі фэрмэрскі партал farmer.pl паведаміў, што толькі ў Падляскім ваяводзтве было выплачана 6 мільёнаў злотых (каля 1,6 мільёна $) кампэнсацый фэрмэрам за ўчыненую зубрамі шкоду. На Падляшшы цяпер жыве каля 1500 зуброў. Фэрмэры кажуць, што гэта занадта шмат і заклікаюць рэгуляваць колькасьць папуляцыі «лясных цароў».
У беларускай частцы Белавескай пушчы налічылі крыху больш за 700 зуброў. Агульная колькасьць зуброў і ў Польшчы, і ў Беларусі падобная — каля трох тысяч жывёлін.
Паляваньне на зуброў у Беларусі дазволенае паводле квотаў. Плюс асобныя квоты прадаюцца за вялікія грошы на трафэйнае паляваньне. Летась у Чырвонай кнізе панізілі ахоўны статус гэтага віду. У 2023 годзе кіраўнік Беларускага таварыства паляўнічых і рыбаловаў Ігар Шуневіч выступіў за перавод зубра ў статус паляўнічай жывёлы:
«Яму сёньня нічога не пагражае, вымаць яго можна не адзінкамі — дзясяткамі», — казаў Шуневіч.
Летась у Беларусі ўпершыню за доўгі час адкрылі паляваньне на мядзьведзяў і рысяў.
Форум