Як паведамляе Літоўскае радыё і тэлебачаньне, з прадстаўніком ЗША па Беларусі Джонам Коўлам ў Вільні перад ягоным выездам у Менск на перамовы з Лукашэнкам сустрэліся літоўскія дэпутаты Вегеле, Гражуліс і Янкунас.
«Дэпутаты Сейма Ігнас Вегеле і Рымас Янкунас, а таксама дэпутат Эўрапарлямэнту Пятрас Гражуліс у гатэлі Kempinski сустрэліся з прадстаўніком прэзыдэнта Дональда Трампа Джонам Коўлам», — паведаміла LRT.
«Гражуліс паведаміў, што з пасланцом ЗША абмяркоўваў нежаданьне Літвы супрацоўнічаць на палітычным узроўні з рэжымам Аляксандра Лукашэнкі. Як вядома, беларускі бок цісьне на Літву, заклікаючы пачаць дыялёг з Менскам на ўзроўні міністраў, аднак Літва адмаўляецца гэта рабіць», — паведаміла LRT.
Дэпутаты і амэрыканскі прадстаўнік дамовіліся моцна не афішаваць гэтую сустрэчу, бо «Аляксандар Лукашэнка рэагуе вельмі адчувальна», спасылаецца рэсурс на словы аднаго з дэпутатаў.
Дэпутаты лічаць, што адмова літоўскага боку сфармаваць дэлегацыю і весьці перамовы на палітычным узроўні з Беларусьсю для вырашэньня ўсіх пытаньняў была памылковай. Мы лічым, што гэта памылка і што размаўляць усё ж трэба.
«Калі Дональд Трамп вядзе перамовы, тэлефануе і шукае кантакт, нам ня варта занадта дэманстраваць сваю прынцыповасьць», — сказаў Пятрас Гражуліс.
Каб вяліся перамовы, літоўскія фуры, якія захрасьлі ў Беларусі, ужо былі б вызваленыя, лічыць ён.
Гражуліс адзначыў, што найбольш актыўным на сустрэчы быў дэпутат Сейма Ігнас Вегеле, які ўзьнімаў большасьць гэтых пытаньняў. Паводле яго слоў, палітыкі прадставілі альтэрнатыўную пазыцыю ў параўнаньні зь літоўскага ўраду, — паведаміла LRT.
«Нашая пазыцыя адрозьніваецца ад афіцыйнай. Я думаю, што амэрыканцы хочуць зразумець, чаму няма супрацоўніцтва і перамоваў, чаму не ствараецца палітычная група для дыялёгу. Аляксандр Лукашэнка назначыў міністра замежных спраў для перамоваў, але літоўскі бок адмовіўся. Магчыма, амэрыканцы хочуць пачуць іншы пункт гледжаньня — чаму вы так думаеце і чаму адбываецца менавіта так», — сказаў LRT эўрадэпутат Пятрас Гражуліс.
Паводле слоў Гражуліса, на сустрэчы таксама абмяркоўваліся пытаньні санкцый супраць угнаеньняў. Ён адзначыў, што гэтыя санкцыі, на яго думку, выгадныя Ўладзіміру Пуціну і шкодзяць Літве, паколькі цэны на ўгнаеньні вырасьлі, а расейская кампанія «Уралкалій» пачала атрымліваць вялікія прыбыткі.
Паводле яго слоў, Джон Коўл выказаў надзею адзьдзяліць рэжым Лукашэнкі ад Уладзіміра Пуціна, хаця пакуль не зразумела, як гэта можна будзе зрабіць.
Форум