Паветраная прастора над аэрапортам закрывалася, бо «былі заўважаныя навігацыйныя пазнакі, якія нагадваюць мэтэазонды з кантрабандай», піша Delfi.
Папярэдні раз аэрапорт Вільні прыпыняў працу праз прылёт з боку Беларусі мэтэазондаў з кантрабандай увечары 17 лютага.
Уварваньне паветраных шароў з кантрабанднымі цыгарэтамі зь Беларусі ў Літву ўвосень і ў пачатку сьнежня 2025 году стала прычынай неаднаразовага закрыцьця віленскага аэрапорту, разьмешчанага недалёка ад беларускай мяжы.
У спробе прымусіць Менск паўплываць на сытуацыю Літва з 29 кастрычніка па 19 лістапада закрывала мяжу зь Беларусьсю.
Летась 9 сьнежня ўрад Літвы абвясьціў экстрэмальную сытуацыю дзяржаўнага ўзроўню праз «гібрыдную атаку Беларусі». Рашэньне прынялі «ў сувязі з пагрозай нацыянальнай бясьпецы дзяржавы і небясьпекай для жыцьця і здароўя людзей, а таксама для маёмасьці і (або) навакольнага асяродзьдзя, створанага тым, што на тэрыторыю Літвы зь Беларусі запускаюцца паветраныя шары, якія перавозяць кантрабанду».
Форум