Як паведаміў тэлеграм-канал «Культура і мастацтва», ім стаў рэжысэр Дзьмітрый Акімаў. Паводле інфармацыі выданьня «Люстэрка», Дзьмітрый Акімаў зьяўляецца грамадзянінам Расеі, ён скончыў факультэт рэжысуры тэатральнага інстытуту імя Шчукіна ў 2018 годзе. Працаваў галоўным рэжысэрам у шэрагу расейскіх тэатраў.
Міністар культуры Руслан Чарнецкі зьвязаў зь яго прызначэньнем пачатак «новай старонкі ў гісторыі славутага, флягманскага тэатра Беларусі».
«Мая першачарговая мэта — рэалізацыя стратэгіі разьвіцца тэатра на доўгі пэрыяд, каб мы ўсе адчулі і асэнсавалі яго місію і кірунак. Мы павінны зразумець, якім ён мусіць быць па ўсіх паказьніках: творчым, эканамічным і грамадзка-палітычным. Буду рабіць усё магчымае, каб тэатар адпавядаў свайму высокаму статусу», — сказаў Дзьмітрый Акімаў.
2020 год быў для тэатру імя Янкі Купалы юбілейным, яму спаўнялася 100 гадоў. Да юбілею ў жніўні 2020 году выйшлі дзьве кнігі — «Гісторыя Купалаўскага тэатру» і «Сцэнаграфія». Выданьні адразу сталі бібліяграфічнымі рэдкасьцямі. На 14,15 і 16 верасьня плянавалі вялікую вечарыну з дакумэнтальнай тэатральнай хронікай, якую знайшлі ў розных архівах, з фрагмэнтамі выбітных спэктакляў. У Аляксандраўскім сквэры 21 верасьня з 12-й да 23-й гадзіны меркавалі правесьці «Тэатральны пікнік», а за будынкам тэатру зьбіраліся адкрыць «Алею зорак».
Пасьля масавых фальсыфікацыяў на прэзыдэнцкіх выбарах 2020 году, жорсткага разгону акцыяў пратэсту, пабіцьця і катаваньняў пратэстоўцаў, калектыў Купалаўскага запатрабаваў спыніць гвалт і публічна выступіў за перападлік галасоў з удзелам незалежных назіральнікаў.
Пазьней бальшыня актораў і тагачасны дырэктар тэатру Павал Латушка падпісалі адкрыты зварот да сілавікоў, у якім заклікалі да неадкладнай адстаўкі і завядзеньня крымінальных справаў супраць тых, хто аддаваў «злачынныя загады», і «ўсіх службовых асобаў, вінаватых ці тых, хто мае дачыненьне да гэтых злачынстваў». Але потым бальшыня актораў звольніліся, частка зь іх вымушаныя была пакінуць Беларусь.
Форум