У Італіі адкрылася Паралімпіяда. Беларускія атлеты прайшлі пад дзяржаўным сьцягам, іранскі спартовец не прыехаў. ФОТА
Цырымонія адкрыцьця Паралімпійскіх гульняў-2026 адбылася ў італьянскім горадзе Верона.
1
Упершыню з 2022 году расейскія і беларускія спартоўцы ўдзельнічалі ў ёй пад дзяржаўнымі сьцягамі сваіх краіны.
2
З гэтай прычыны спартоўцы некалькіх краін разам з Украінай байкатавалі ўдзел у цырымоніі адкрыцьця. Усяго ў спаборніцтвах выступяць атлеты з 55 краін.
3
Як паведаміла агенцтва Reuters, трыбуны вельмі стрымана прывіталі спартоўцаў Беларусі і Расеі, калі яны выйшлі на традыцыйны марш каманд пад сваімі дзяржаўнымі сьцягамі, а калі на трыбунах зьявіўся прынамсі адзін расейскі сьцяг гледачы пачалі сьвіцсьцець. Таксама стрымана публіка прыняла і атлетаў з Ізраілю.
4
Рымскі амфітэатар Вероны прымаў першае мерапрыемства 50-х Паралімпійскіх гульняў менш, чым праз два тыдні пасьля разьвітання з зімовымі Алімпійскімі гульнямі. За гэты час стытуацыя ў сьцеве рэка абвастрылася праз супольную ізраільска-амэрыканскую ваенную апэрацыю супраць Ірану. З гэтай прычыны на Паралімпіяду ня змог прыехаць адзіны іранскі спартовец. Перад беларускай дэлегацыяй несьлі таблічку з надпісам BIELORUSSIA, як у Італіі называюць Беларусь.
5
«Чатыры гады таму я сказаў, што ў жаху ад таго, што адбываецца ў сьвеце. На жаль, сытуацыя не палепшылася», – заявіў у сваёй прамове прэзыдэнт Міжнароднага паралімпійскага камітэту (МПК) Эндру Парсанс.
6
У цырымоніі адкрыцьця зімовых Паралімпійскіх гульняў, якую назвалі «Жыцьцё ў руху» ўдзельнічалі артысты з абмежаванымі магчымасьцямі. Гімн выканала італьянска-малійская сьпявачка Мімі Каруза. Выступіў таксама заснавальнік The Police Сцюарта Коўплэнд з брытанскім барабаншчыкам Карнэлам Хрыска-Мун, які нарадзіўся без перадплеччаў.
7
«У сьвеце, дзе некаторыя краіны больш вядомыя па імёнах сваіх лідэраў, я аддаю перавагу ведаць краіны па імёнах іх спартоўцаў», – дадаў Эндру Парсанс, перш, чым прэзыдэнт Італіі Серджа Матарэля абвясьціў гульні адкрытымі.«Тут адрозьненьні – не прычыны для падзелу, а крыніцы сілы», – сказаў прэзыдэнт МПК.
8
Паводле МПК, удзел толькі 28 нацыянальных паралімпійскіх дэлегацый быў прадыктаваны нібыта «раскладам спаборніцтваў». Згодна зь інфармацыяй Міжнароднага паралімпійскага камітэту, толькі шэсьць эўрапейскіх краін далучыліся да Ўкраіны ў байкоце цырымоніі адкрыцьця. Раней украінскі бок заяўляў, што да байкоту далучыліся 14 замежных дзяржаў.
9
Пакуль паралімпійскія агні адначасова запальвалі ў Міляне і Картыне д’Ампэцца, італьянская фэхтавальніца на інвалідным вазку Бэатрыс «Бэбэ» Віа, двухразовая залатая прызёрка Паралімпійскіх гульняў, несла факел на арэне Вероны.
10
На Паралімпійскіх гульнях, якія будуць працягвацца да 15 сакавіка, возьме ўдзел рэкордная колькасьць спартоўцаў – 611 атлетаў будуць спаборнічаць у 79 мэдальных дысцыплінах у шасьці відах спорту. Упершыню адбудуцца спаборніцтвы ў зьмешаным парным разрадзе па кёрлінгу на інвалідных вазках, у якіх возьмуць удзел прадстаўнікі Сальвадора, Гаіці, Чарнагорыі, Паўночнай Макэдоніі і Партугаліі.
11
Папярэдні рэкорд быў у 2018 годзе, калі спаборнічалі 564 спартоўцы з 48 краін сьвету.
12
Нягледзячы на тое, што ў цырымоніі адкрыцьця ўдзельнічалі толькі 28 краін, валянтэры пранесьлі сьцягі ўсіх 55 дзяржаў, спартоўцы якіх будуць выступаць на Паралімпіядзе, у тым ліку і Ўкраіны.
Выкарыстаныя публікацыі агенцтва Reuters, AFP і Радыё Свабодная Эўропа / Радыё Свабода.
Выкарыстаныя публікацыі агенцтва Reuters, AFP і Радыё Свабодная Эўропа / Радыё Свабода.
Катэгорыі
- Мультымэдыя
- Відэа
Форум