Брытанскі ўрад будзе байкатаваць цырымоніі адкрыцьця і закрыцьця Зімовых Паралімпійскіх гульняў на знак пратэсту супраць дазволу расейскім і беларускім спартсмэнам спаборнічаць пад сьцягамі сваіх краін, піша AFP. Шэсьць спартсмэнаў з Расеі і чатыры зь Беларусі будуць непасрэдна прадстаўляць свае краіны, а не спаборнічаць у якасьці нэйтральных спартоўцаў на Гульнях у Італіі.
Гэта адбылося пасьля таго, як Міжнародны паралімпійскі камітэт (МПК) зьняў частковую забарону, а Расея і Беларусь пасьпяхова падалі апэляцыю ў Спартыўны арбітражны суд (CAS) супраць забароны, уведзенай FIS, глябальным кіруючым органам па лыжным спорце і сноўбордынгу. Расея і Беларусь знаходзяцца ў міжнароднай спартыўнай ізаляцыі з моманту ўварваньня ва Ўкраіну ў 2022 годзе, і гэтае іх уключэньне ў Паралімпійскія гульні стала самым значным крокам назад з таго часу.
Украіна і іншыя краіны ўжо заявілі пра свой намер байкатаваць цырымоніі адкрыцьця і закрыцьця, і цяпер да іх далучылася Вялікая Брытанія. Прадстаўнік брытанскага ўраду заявіў 5 сакавіка:
«Мы рэзка выступаем супраць рашэньня Міжнароднага паралімпійскага камітэту дазволіць расейскім і беларускім спартсмэнам спаборнічаць пад сваімі сьцягамі ў Міляне і Картыне д’Ампэцца на Зімовых Паралімпійскіх гульнях 2026 года.
Мы выразна заявілі, што расейская і беларуская дзяржавы не павінны быць прадстаўленыя ў міжнародным спорце, пакуль працягваецца варварскае паўнамаштабнае ўварваньне ва Ўкраіну. Таму ніякія міністры і чыноўнікі ўраду ня будуць прысутнічаць на цырымоніях адкрыцьця або закрыцьця Паралімпійскіх гульняў».
У заяве ўраду Вялікабрытаніі дадаецца, што міністар спорту Стэфані Пікок будзе ў Картыне д’Ампэцца выключна для таго, каб падтрымаць брытанскіх спартсмэнаў.
«Яны нястомна працавалі апошнія чатыры гады, каб быць гатовымі да найважнейшага моманту свайго спартыўнага жыцьця, і заслугоўваюць падтрымкі нацыі», — гаворыцца ў заяве.
Міжнародны паралімпійскі камітэт апраўдваецца
Удзел Расеі і Беларусі ў Паралімпійскіх гульнях стаў вынікам дэмакратычнага працэсу, заявіў у чацьвер 5 сакавіка прэзыдэнт Міжнароднага паралімпійскага камітэту (МПК) Эндру Парсанс, за дзень да цырымоніі адкрыцьця, піша Reuters.
Расея і Беларусь былі забароненыя на Паралімпійскіх спаборніцтвах пасьля ўварваньня Масквы ва Ўкраіну ў 2022 годзе, але былі зноў прыняты ў МПК у верасьні мінулага году пасьля галасаваньня на Гэнэральнай асамблеі арганізацыі.
Паколькі яны ўсё яшчэ былі забароненыя федэрацыямі зімовых відаў спорту, дзьве краіны атрымалі месцы на цяперашніх Паралімпійскіх гульнях пасьля таго, як у сьнежні выйгралі апэляцыю ў Арбітражным судзе па спорце супраць Міжнароднай фэдэрацыі лыжнага спорту і сноўборда (FIS).
«Я прызнаю, што гэтае рашэньне не было добра ўспрынятае ў некаторых частках сьвету, — сказаў Парсанс на прэс-канфэрэнцыі. — Я хачу падкрэсьліць, што МПК — гэта дэмакратычная глябальная арганізацыя, рашэньні якой аб прыпыненьні сяброўства прымаюцца яе чальцамі».
Некалькі краін вырашылі прапусьціць парад падчас цырымоніі адкрыцьця ў пятніцу, каб прадэманстраваць салідарнасьць з Украінай.
«Мы ня можам выбіраць, калі быць дэмакратычнымі, зыходзячы з вынікаў рашэньняў Гэнэральнай асамблеі, — сказаў Парсанс.— Гэта быў дэмакратычны працэс, праведзены ў адпаведнасьці з працэдурай, выкладзенай у статуце МПК. 177 з 211 нашых арганізацый-чальцоў прысутнічалі на галасаваньні».
«МПК у цяперашні час сочыць за сытуацыяй і працягвае зьбіраць, пацьвярджаць і ацэньваць даступную інфармацыю, каб вызначыць уплыў на гэтыя Гульні і больш шырокі паралімпійскі рух», — сказаў Парсанс.
На Паралімпійскіх гульнях, якія адкрываюцца сёньня, будзе спаборнічаць рэкордная колькасьць спартсмэнаў з 56 дэлегацый — 612.
Форум