Да такой высновы прыйшла парлямэнцкая сьледчая камісія. Яе прадстаўнікі разгромна скрытыкавалі працу музэйнай адміністрацыі, абвінаваціўшы кіраўніцтва Люўру ў грэбаваньні пытаньнямі бясьпекі, піша Еuronews.
Аляксандар Парцье, дакладчык сьледчай камісіі, адзначыў, што бясьпека не была для кіраўніцтва музэю чымсьці першарадным:
«Цалкам відавочна, што пытаньні бясьпекі не былі прыярытэтам для кіраўніцтва на працягу некалькіх гадоў, калі не дзесяцігодзьдзяў. Размова ідзе не аб вясковым музэі, а аб найбуйнейшым музэі сьвету. Калі дзяржаўныя органы даюць вам выключныя сродкі, гэта патрабуе й выключнага кантролю».
Сябры сьледчай камісіі заклікалі звольніць дырэктарку Люўру Ляранс дэ Кар. Яна кіруе музэем з 2021 году. Адразу пасьля рабаваньня ў кастрычніку летась яна ўжо падавала ў адстаўку, але тады прэзыдэнт Францыі Эмануэль Макрон яе не прыняў.
З моманту крадзяжу васьмі каштоўнасьцяў, якія належалі каралеўскім сем’ям Францыі ў XIX стагодзьдзі, жыцьцё Люўру было адзначанае цэлым шэрагам іншых скандалаў.
Нядаўна ў выніку паліцэйскай апэрацыі ўдалося знэўтралізаваць злачынную сетку, якая падазравалася ў махлярстве з квіткамі.
У лістападзе летась у выніку працёку вады ў бібліятэцы Дэпартамэнту эгіпецкіх старажытнасьцяў было пашкоджана некалькі соцень твораў мастацтва.
Акрамя таго, на працягу некалькіх дзён у музэі праходзілі забастоўкі: супрацоўнікі пратэставалі супраць пагаршэньня ўмоў працы, уключаючы недахоп пэрсаналу і праблемы ў забесьпячэньні бясьпекі.
Форум