Сьпевака з «Маратону адзінства» асудзілі за камэнтары
Сьпявак Раман Юркоў атрымаў ад Лукашэнкі ліст падзякі за падтрымку яго кандыдатуры на апошніх выбарах. А ўжо праз месяц артыста затрымалі сілавікі — знайшлі камэнтары, якія артыст пісаў у 2020 годзе.
Рамана абвінавацілі па 130 артыкуле Крымінальнага кодэксу (распальваньне варожасьці) і судзілі ў Менскім гарадзкім судзе, піша «Наша Ніва».
Юркову прысудзілі «хатнюю хімію». У канцы 2025 года, калі прысуд набыў сілу, КДБ уключыў сьпевака ў «сьпіс тэрарыстаў».
Новы арышт пасьля прыезду з Польшчы
Пасьля вяртаньня з Польшчы арыштавалі сузаснавальніцу стартапа GlobalTips Алену Змушко, гэта здарылася восеньню 2024 года. Дома яе чакаюць муж і васьмігадовы сын, піша «Наша Ніва».
Апошнія гады яна жыла ў Варшаве, была сузаснавальніцай і вядучым бізнэс-аналітыкам стартапа GlobalTips. Вядома, што Алена пэрыядычна вярталася ў Беларусь. 13 лістапада 2024 жанчына ехала дадому разам з сынам, каб наведаць бацькоў, але яе затрымалі.
Алену асудзілі ў Горадзенскім абласным судзе. 24 лістапада 2025 года ёй вынесьлі прысуд паводле частак 1 і 2 артыкула 361‑4 КК (садзейнічаньне экстрэмісцкай дзейнасьці) — тры гады калёніі. Па зьвестках праваабаронцаў, Алену абвінавацілі ў дапамозе палітвязьням. Цяпер палітзьняволеная знаходзіцца ў жаночай папраўчай калёніі № 4 ў Гомлі.
