Пасьля «зачысткі» грамадзка-палітычнага сэктару ў Беларусі засталося 4 зарэгістраваныя палітычныя партыі з 15, зьнікла каля 2000 грамадзкіх арганізацыў.
Як паведамляе Міністэрства юстыцыі Беларусі, на сёньня ў краіне зарэгістраваныя чатыры палітычныя партыі.
- Гэта партыя «Белая Русь», старшыня Вольга Чамаданава,
- Лібэральна-дэмакратычная партыя, старшыня Алег Гайдукевіч,
- Камуністычная партыя Беларусі, першы сакратар Сяргей Сыранкоў,
- Рэспубліканская партыя працы і справядлівасьці, старшыня Аляксандар Хіжняк.
Перад мясцовымі выбарамі 2019 году Цэнтральная выбарчая камісія Беларусі публікавала сьпіс 15 палітычных партыяў, зарэгістраваных у краіне.
Сярод іх былі як неактыўныя на той час Сацыял-дэмакратычная партыя народнай згоды ці Беларуская сацыяльна-спартыўная партыя, так і вядомыя апазыцыйныя партыі — Аб’яднаная грамадзянская партыя, Партыя БНФ, Беларуская партыя левых «Справядлівы сьвет».
З таго часу 12 партыяў закрылі, узьнікла толькі адна новая праўладная партыя «Белая Русь».
На 1 студзеня 2020 году ў Беларусі было зарэгістравана 3021 грамадзкае аб’яднаньне, паведамляла ў той час «Беларусь сегодня».
Паводле інфармацыі Lawtrend, на канец сьнежня 2025 году ў працэсе прымусовай ліквідацыі знаходзілася ня менш за 1220 некамэрцыйных арганізацыяў. Рашэньне аб самастойнай ліквідацыі прынялі прынамсі 770 НКА.
