Прадстаўніцтва ў сацыяльнай палітыцы Аб’яднанага пераходнага кабінэту (АПК) стварае інфармацыйныя цэнтры для «вырашэньня праблемаў беларусаў за мяжой». Пра гэта 17 лютага паведаміла прэс-служба АПК.
Інфармацыйныя цэнтры «ў розных краінах для вырашэньня сацыяльных праблемаў беларусаў замежжа стануць новым прыярытэтам прадстаўніцтва», паведаміла намесьніца прадстаўніка ў сацыяльнай палітыцы АПК Ірына Маклейн, піша «Позірк».
«Беларусы ў розных краінах сутыкаюцца з падобнымі сацыяльнымі праблемамі. Падтрымка ў іх вырашэньні на сёньня ёсьць, але яна фрагмэнтарная і не структураваная. Інфацэнтры павінны стаць часткай сыстэмнага падыходу», — адзначыла Маклейн.
Паводле яе, інфацэнтры ня будуць «новай палітычнай арганізацыяй», яны стануць «сэрвіснай функцыяй унутры ўжо наяўных дыяспаральных супольнасьцяў і ініцыятываў».
У інфацэнтар, удакладніла яна, «чалавек зможа зьвярнуцца з канкрэтнай праблемай і атрымаць кансультацыю (напрыклад, наконт легалізацыі, працы), накіраваньне да юрыста, падтрымку ў пошуку мэдычнай дапамогі, сувязі з крызіснымі службамі, інфармацыю пра сацыяльныя правы».
«Кожны зварот стане часткаю агульнай карціны праблемаў беларусаў у эміграцыі. Іх аналіз дазволіць пераходзіць ад адраснай дапамогі да сыстэмнай працы. Інфацэнтар не замяняе дзяржаву, ён парадкуе сацыяльную падтрымку ўнутры беларускай супольнасьці», — рэзюмавала прадстаўніца АПК.
- Паводле зьвестак Парлямэнцкай асамблеі Рады Эўропы, ад 200 да 500 тысяч чалавек пакінулі Беларусь пасьля падзеяў жніўня 2020 году.
- Офіс Высокага камісара ААН у правах чалавека называў меншую лічбу — 100 тысяч.
- Згодна з апошняй справаздачай Міжнароднай арганізацыі міграцыі ААН, у 2024 годзе за мяжой жылі 790,2 тыс. беларускіх грамадзян.
Форум