Signal лічыцца адным з самых бясьпечных мэсэнджараў у сьвеце, ён выкарыстоўвае скразное шыфраваньне end-to-end і адкрыты зыходны код. Гэта значыць, што нават самыя распрацоўнікі і каманда Signal ня маюць доступу да асабістага ліставаньня карыстальнікаў і не захоўваюць іх мэтазьвесткі.
Рэч у тым, што пры стварэньні ўліковага запісу ў Signal карыстальніку трэба ўвесьці свой нумар мабільнага тэлефону і пацьвердзіць яго з дапамогай 6-значнага коду, які мабільны апэратар дасылае праз SMS-паведамленьне. Аднак расьсьледніцкая ініцыятыва «Бюро» атрымала ад сваіх чытачоў інфармацыю, што апэратар А1 абмяжоўвае магчымасьць атрыманьня такога коду.
«Бюро» папрасіла беларусаў, якія раней ніколі не карысталіся Signal і маюць беларускую SIM-картку, усталяваць аплікацыю і зарэгістраваць уліковы запіс.
Выявілася, што карыстальнікі ўнутры Беларусі могуць заладоўваць і ўсталёўваць мабільную праграму Signal на смартфоны, а вось беспасярэдне зарэгістраваць свой уліковы запіс удалося толькі абанэнтам мабільных апэратараў МТС і Life, прычым нават у роўмінгу.
Карыстальнікі А1 на запыт коду атрымліваюць наступнае паведамленьне:
«Signal не ўдалося адправіць SMS-код праз праблемы з пастаўніком SMS-паведамленьняў».
«Бюро» пад выглядам занепакоенага карыстальніка зьвязалася з тэхнічнай падтрымкай А1 — там адмаўляюць якія-хаця абмежаваньні што да Signal:
«Кампанія не блякуе працы аплікацыяў, мэсэнджараў і сацыяльных сетак».
«Бюро» таксама накіравала афіцыйны запыт у Signal і пакуль чакае адказу.
У суседняй Расеі «Роскомнадзор» заблякаваў Signal яшчэ 9 жніўня 2024 году праз «парушэньне патрабаваньняў заканадаўства» і выкарыстаньне мэсэнджару з «тэрарыстычнымі/экстрэмісцкімі мэтамі».
Форум