Раённае выданьне «Шахцёр» з спасылкай на ўпраўленьне адукацыі Салігорскага райвыканкаму паведаміла, што гэтых жывёлак знайшлі раніцай у рэкрэацыі корпусу кабінэтаў расейскай мовы на другім паверсе.
«Пры ўключэньні сьвятла пабачылі скразную дзірку ў сьцяне пад падвоканьнем. На падлозе і на стале побач зь дзіркай — сьляды жыцьцядзейнасьці жывёл, у рэкрэацыі быў непрыемны пах і піск, чуліся гукі валтузьні. Падобна, кажаны, якія зімавалі на фасадзе будынку, у моцныя маразы пачалі імкнуцца да цяпла ад батарэі і прагрызьлі ўцяпляльнік пад аконнай рамай», — паведаміла выданьне.
Супрацоўнікі гімназіі выклікалі мясцовы падразьдзел Міністэрства надзвычайных сытуацыйяў. Яны прыехалі на месца а 8:40, агледзелі месца здарэньня, дасталі зь дзіркі прыблізна 230 кажаноў, а супрацоўнікі гімназіі іх сабралі, зьмясьцілі ва ўцепленыя каробкі і адвезьлі да цеплатрасы.
Выданьне не паведаміла, як у гэтым выпадку кажаны апынуліся ў сьнезе каля гімназіі і колькі зь іх выжыла.
Форум