На запыт DW Беларусь у Commerzbank, дзе ў былой палітзьняволенай Марыі Калесьнікавай быў рахунак да яе арышту ў Беларусі, адказалі, што ня могуць камэнтаваць адносіны з асобнымі кліентамі.
У банку ўдакладнілі, што запыты на аднаўленьне рахунку перадаюць у адпаведны адзьдзел для разгляду, які потым, як правіла, зьвязваецца з кліентам.
«У цэлым мы можам сказаць, што працягваем абслугоўваць кліентаў-грамадзян Беларусі, калі яны пражываюць у Эўразьвязе і маюць дзейны від на жыхарства ў той краіне ЭЗ, у якой яны пражываюць», — растлумачыў прадстаўнік Commerzbank.
Як паведаміла 28 студзеня экс-палітзьняволеная Марыя Калесьнікава ў эфіры нямецкага тэлеканалу ARD, пакуль яна сядзела ў турме, нямецкі Commerzbank заблякаваў яе рахунак, адкрыты 17 гадоў таму, і цяпер яна ня можа скарыстацца сваімі сродкамі.
«Даволі пацешная гісторыя. У мяне быў рахунак у Commerzbank 17 гадоў. Калі я была ў калёніі, натуральна, я не магла ім кіраваць. І ў нейкі момант яго заблякавалі. Цяпер мой рахунак заблякаваны, і ў мяне няма доступу да яго з-за санкцыяў супраць Беларусі», — заявіла Калесьнікава.
- Марыю Калесьнікаву затрымалі ў верасьні 2020 году пасьля спробы сілавікоў сілай вывезьці яе з Беларусі.
- Яна парвала пашпарт на мяжы і засталася ў краіне.
- У 2021 годзе суд прысудзіў ёй 11 гадоў пазбаўленьня волі. Яе вызвалілі і вывезьлі зь Беларусі ў сьнежні 2025 году, цяпер яна жыве ў Нямеччыне.
