Паводле апублікаванага раней праекту закону, цяпер абавязкова браць адбіткі пальцаў будуць у наступных выпадках.
У замежнікаў
- якіх дэпартуюць, высылаюць ці перадаюць іншай дзяржаве,
- якіх не пускаюць у краіну праз «забарону» ці «непажаданасьць» уезду,
- якіх памежнікі палічаць патрэбным унесьці ў базу «ў інтарэсах нацыянальнай бясьпекі» (ня тычыцца грамадзян Расеі),
- якія зьвярнуліся па прытулак, дадатковую абарону, дазвол на жыхарства, статус уцекача.
У грамадзян Беларусі
- якія атрымалі іншае грамадзянства,
- якія атрымалі від на жыхарства або дакумэнт іншай дзяржавы, які дае ільготы паводле палітычных, рэлігійных поглядаў або нацыянальнасьці (кшталту „карты паляка“),
- якія стала жывуць за мяжой,
- якія прайшлі працэдуру выезду на сталае месца жыхарства і стаяць на консульскім уліку.
Браць адбіткі ў беларусаў будуць падчас абмену ці выдачы дакумэнтаў.
Таксама ў будуць зьбіраць адбіткі людзей, якія адмаўляюцца або ня могуць паведаміць інфармацыю пра сябе. І ў тых, каго абвяшчалі зьніклым бязь вестак, але потым знайшлі.
Праводзіць дактыляскапію і выкарыстоўваць гэтую інфармацыю змогуць:
- суды,
- органы крымінальнага перасьледу, ўнутраных спраў, памежнай службы,
- іншыя органы, што займаюцца апэратыўнай і вышуковай дзейнасьцю.
Як гаворыцца ў паведамленьні на сайце Лукашэнкі, гэта «будзе спрыяць своечасоваму выяўленьню рызыкаў, выклікаў, пагрозаў нацыянальнай бясьпецы», а таксама «нэўтралізацыі іх унутраных і вонкавых крыніц».
Раней у інтэрвію Свабодзе экспэртка ў міжнародным праве Кацярына Дзяйкала назвала ўвядзеньне абавязковай дактыляскапію беларускіх грамадзян з замежным дазволам на жыхарства «ўмяшаньнем у прыватнае жыцьцё» і «дыскрымінацыяй паводле наяўнасьці сувязі з замежнай дзяржавай».
Форум