Хроніка перасьледу 23 студзеня. Разам з журналістам Кірылам Пазьняком затрымалі і дачку Яніну. Сёньня яе прызналі палітвязьнем

Яе затрымалі разам з бацькам летась 4 верасьня, паведаміла «Вясна». У той жа дзень КДБ абвясьціў «экстрэмісцкім фармаваньнем» YouTube-канал «Платформа 375» і назваў Кірыла Пазьняка ягоным «арганізатарам».

Як стала вядома, разам зь ім затрымалі і 20-гадовую дачку Яніну. Яе абвінавацілі ва ўзаемадзеяньні з «экстрэмісцкім фармаваньнем».

Кірыла Пазьняка прызналі палітвязьнем неўзабаве па затрыманьні — 17 верасьня.

Палітычнага камэнтатара Дзьмітрыя Балкунца зьбіраюцца судзіць завочна

Супраць 42-гадовага Дзьмітрыя Балкунца ў Беларусі распачалі спэцтвытворчасьць. Яго абвінавацілі паводле васьмі артыкулаў Крымінальнага кодэксу:

• Змова або іншыя дзеяньні, зьдзейсьненыя з мэтай захопу ўлады — (ч. 1 арт. 357 КК)
• Заклік да санкцый супраць Рэспублікі Беларусь — (ч. 3 арт. 361 КК)
• Стварэньне экстрэмісцкага фармаваньня або ўдзел у ім — (ч. 1 арт. 361-1 КК)
• Садзейнічаньне экстрэмісцкай дзейнасьці — (ч.ч. 1, 2 арт. 361-4 КК)
• Паклёп на Лукашэнку — (ч.ч. 1, 2 арт. 367 КК)
• Абраза Лукашэнкі — (ч.ч. 1, 2 арт. 368 КК)
• Абраза прадстаўніка ўлады — (арт. 369 КК)
• Дыскрэдытацыя Беларусі — (арт. 369-1 КК)

Сьледчыя запрасілі Балкунца вярнуцца ў Беларусь і прыйсьці ў менскую ўправу сьледчага камітэту, паведаміла «Вясна».

Асудзілі экс-начальніка сьледчага ўпраўленьня Магілёва, якому КДБ вырабіла фэйкавы пашпарт «Новай Беларусі»

Магілёўскі абласны суд прызнаў вінаватым 59‑гадовага Дзьмітрыя Шышкова ў «садзейнічаньні экстрэмісцкай дзейнасьці» (арт. 361‑4), піша «Наша Ніва». Яго пакаралі ці то хіміяй, ці калёніяй — дакладна невядома.

Дзьмітры Шышкоў — былы сьледчы. У 2010‑м быў начальнікам сьледчай управы УУС Магілёўскага аблвыканкама. Пазьней яго адправілі працаваць у Сьледчы камітэт.

Апошняе месца працы — інфармацыйнае агенцтва «Магілёўскія ведамасьці». У этэры АНТ сьцьвярджалі, што Шышкова звольнілі адтуль за палітычныя погляды ў 2023-м.

У сакавіку 2024 году на АНТ паказалі пашпарт «Новай Беларусі», выраблены на імя Шышкова. Аднак дакумэнт відавочна быў фэйкавым. Прозьвішча сьледчага па-беларуску напісалі з памылкай — праз рускую «и».

ГЛЯДЗІЦЕ ТАКСАМА:

Мікалая Аўтуховіча зноў адправяць з калёніі на турэмны рэжым

Улады дадалі ў «сьпіс экстрэмістаў» яшчэ 9 чалавек

1. Сяргей Васюкевіч — 42 гады
2. Аляксандар Конанаў — 27 гадоў
3. Ягор Лялько — 34 гады
4. Сяргей Неліповіч — 44 гады
5. Андрэй Рыжук — 36 гадоў
6. Дзьмітры Спруць — 58 гадоў
7. Іван Фолітар — 48 гадоў
8. Тацьцяна Шчатко — 47 гадоў
9. Дзьмітры Шышкоў — 59 гадоў

Сярод іх — фігурант «справы Гаюна» Іван Фолітар, а таксама Дзьмітры Спруць, якога асудзілі за «распальваньне варожасьці», але вызвалілі «ў сувязі са сканчэньнем тэрміну прыцягненьня да адказнасьці», піша «Вясна».

Усяго ў сьпісе цяпер 6214 чалавек.

Улады дадалі яшчэ 5 рэсурсаў у сьпіс «экстрэмісцкіх матэрыялаў»

Сярод іх — старонка «Нашай Нівы» ў сацсетцы Threads.

• Беларусы ў Iзраili (Instagram)
• Дзе Навiны? (Threads)
• Наша Нiва | Nashaniva.cоm (Threads)
• belarustv BY. ЕвроБеларус | Новости (TikTok)
• Nota Pratэstu (Instagram і Telegram)

ГЛЯДЗІЦЕ ТАКСАМА:

Жанчына паскардзілася на зьдзекі з брата ў калёніі. Праз 10 дзён прапагандысты паказалі, што сьлядоў пабіцьця не відаць