Як паведаміла выданьне BraginInfo, прадстаўнікі кіраўніцтва Гомельскай памежнай групы і Брагінскага райвыканкаму правялі сустрэчу зь мясцовымі жыхарамі, на якой папярэдзілі аб адміністрацыйнай адказнасьці за парушэньні ў памежнай зоне.
У прыватнасьці, першы намесьнік Гомельскай памежнай групы Сяргей Антанюк нагадаў, што за парушэньне парадку ўезду, часовага знаходжаньня і перамяшчэньня ў памежнай зоне або паласе пагражае штраф у памеры ад 10 да 100 базавых велічынь (з 1 студзеня базавая велічыня складае 45 рублёў. — РС).
Сярод тэм, якія асабліва цікавілі мясцовых жыхароў, выданьне назвала толькі адну праблему — беспрытульныя сабакі.
Гомельскі абласны выканкам зацьвердзіў межы памежнай зоны і паласы на тэрыторыі Гомельскай вобласьці 22 сьнежня 2025 году. З 2020 году, калі ўпершыню прымалі аналягічнае рашэньне зоны павялічыліся.
Памежная зона дзейнічае на тэрыторыях Брагінскага, Гомельскага, Добрускага, Ельскага, Лельчыцкага, Лоеўскага, Нараўлянскага і Хойніцкага раёнаў.
З зоны асаблівага памежнага кантролю выключаюцца толькі тэрыторыі санаторыяў, будынкаў адпачынку, іншых аздараўленчых устаноў, а таксама месцы для рэлігійных абрадаў і турыстычныя маршруты, што праходзяць на тэрыторыі Палескага дзяржаўнага радыяцыйна-экалягічнага запаведніка і ўзгодненыя з тэрытарыяльнымі органамі памежнай службы.
Форум