Дата дня
22 студзеня 1863 году Цэнтральны нацыянальны камітэт у Варшаве абвясьціў пра пачатак паўстаньня супраць расейскага царызму. Празь 10 дзён, 1 лютага, да яго далучыліся паўстанцы Беларусі і Літвы пад кіраўніцтвам Кастуся Каліноўскага. Паўстаньне мела на мэце адмяніць падзелы Рэчы Паспалітай у межах 1772 году. Яно было жорстка задушанае ўладамі ў 1864 годзе.
Дзень у гісторыі
1558 — у гэты дзень пачалася Лівонская вайна, якая доўжылася 25 гадоў. Вайну вяла Маскоўская дзяржава супраць Лівонскага ордэна, ВКЛ (потым Рэчы Паспалітай), Швэцыі за кантроль над Лівоніяй, то бок выйсьцем да Балтыйскага мора.
1943 — у Янаве Палескім сярод іншых закладнікаў фашысты расстралялі Вітальда Івіцкага, каталіцкага сьвятара, які пайшоў на расстрэл замест іншага чалавека.
1980 — затрымалі і выслалі акадэміка Андрэя Сахарава, расейскага і савецкага фізыка, праваабаронца і палітычнага дзеяча.
У гэты дзень нарадзіліся
1561 — Фрэнсіс Бэкан, ангельскі філёзаф, навуковец і грамадзкі дзеяч.
1788 — Джордж Байран, ангельскі паэт, лорд.
Спрадвечны дух! Ня знаючы акоў,
Зіхціш ты, Воля, найясьней з-за крат.
У сэрцах там пачэсны твой пасад,
Там незгасальная к табе любоў.
І хоць тваіх зьняволілі сыноў,
Забралі ў змрочны, падзямельны лёх, —
Зь іх мук Айчына йдзе да перамог,
Ты ўзьнімеш крылы ў першым ветры зноў.
1890 — Ільдэфонс Бобіч, каталіцкі сьвятар, адзін з пачынальнікаў беларускага руху. Найбольш значная роля ксяндза Бобіча — у справе беларусізацыі касьцёла.
1898 — Сяргей Эйзэштэйн, савецкі рэжысэр, сцэнарыст, тэарэтык кіно і пэдагог.
1906 — Андрэй Александровіч, беларускі паэт.
Хмар перуновых абоз
Ехаў па пыльнаму бруку.
Вецер пад рокатны грукат
Груз навальніцы растрос.
Дождж адшумеў. 3-пад рукі
Глянула сонца і дбала
Па вуліцах параскідала
Праменныя ручнікі.
1926 — Ізяслаў (Бруцкі), мітрапаліт БАПЦ.
1933 — Алена Лось, мастачка, афарміцелька кніг.
1935 — Віктар Ракаў, беларускі паэт.
1935 — Аляксандар Мень, праваслаўны сьвятар, багаслоў, аўтар кніг па багаслоўі, гісторыі хрысьціянства і іншых рэлігій.
У памяці
1901 — Вікторыя, каралева Вялікай Брытаніі.
2012 — Яўген Шатохін, беларускі мастак.
2014 — беларус Міхась Жызьнеўскі, актывіст Майдану. Герой Нябеснай сотні загінуў падчас сутыкненьняў на вуліцы Грушэўскага ў Кіеве, калі атрымаў агнястрэльнае раненьне ў сэрца.
