Забалоцкі зьняў быкаўскую «Альпійскую баляду» і шукшынскую «Калину красную». Яго фільм «Праз могілкі» увайшоў у сотню найлепшых стужак пра вайну па вэрсіі UNESCO. Яму прысьвячаў свае вершы Ўладзімер Караткевіч.
Анатоль Забалоцкі нарадзіўся ў 1935 годзе ў Краснаярскім краі. У інтэрвію Свабодзе ён казаў, што «па дзеду — беларус. Мой дзед Канстанцін Лявонавіч Забалоцкі быў з Барысава, у сталыпінскую рэформу перасяліўся ў Сібір, моцна асеў на зямлі».
Пасьля заканчэньня Маскоўскага інстытуту кінэматаграфіі (1960) быў накіраваны на «Беларусьфільм», дзе працаваў каля дзесяці гадоў. Удзельнічаў у стварэньні 15 фільмаў, сярод якіх «Альпійская баляда», «Хрыстос прызямліўся ў Гародні», «Праз могілкі», «Печкі-лавачкі», «Каліна красная». Апошнім часам займаўся мастацкай фатаграфіяй. Жыў у Маскве.
Вось як Анатоль Забалоцкі ў інтэрвію Свабодзе ў 2016 годзе камэнтаваў зьяўленьне ў Расеі помнікаў заснавальнікам ГУЛАГу:
«Думаю, што помнікі арганізатарам лягероў ставяць самі былыя арганізатары. Я бачыў сучасныя дакумэнтальныя фільмы — аказваецца, яны на Салаўках былі самымі галоўнымі. Цяпер героямі сталі былыя ахоўнікі ў Гулагу».
Форум