Суд завяршыў ліквідацыю інфармацыйнай кампаніі БелаПАН, мільённы «доўг» павесілі на былых кіраўнікоў

Палітвязень Андрэй Аляксандраў, экс-намесьнік дырэктара кампаніі БелаПАН. Архіўнае фота
Палітвязень Андрэй Аляксандраў, экс-намесьнік дырэктара кампаніі БелаПАН. Архіўнае фота

23 сьнежня эканамічны суд Менска падвёў рысу пад працэсам ліквідацыі заснавальніка БелаПАН — аднайменнага ЗАТ, які доўжыўся амаль два гады.

Як паведаміў «Позірк», пастанову «аб завяршэньні ліквідацыйнай вытворчасьці» вынес судзьдзя Аляксандр Ханеўскі, які абавязаў прызначанага раней антыкрызісным кіраўніком прадпрымальніка Руслана Куліча «закрыць банкаўскія рахункі даўжніка».

Пастанова магла быць абскарджаная ў апэляцыйнай інстанцыі на працягу 15 дзён з моманту прыняцьця, але няма інфармацыі пра тое, што гэта было зроблена, паведамляе «Позірк».

Паводле зьвестак «Позірка» крэдыторамі адносна БелаПАН былі прызнаныя Фонд сацыяльнай абароны насельніцтва, а таксама інспэкцыя Міністэрства падаткаў і збораў Першамайскага раёна Менска і філіял «Белдзяржстраху» па Менску. Падаткавікі патрабавалі ад кампаніі БелаПАН 521.617 рублёў 97 капеек, страхавальнікі — 8.417 рублёў 25 капеек. З улікам пэнсійнага фонду набегла агульнай «запазычанасьці» 1.143.028 рублёў 11 капеек (плюс 400 рублёў дзяржпошліны). Гэтыя грошы судзьдзя Аляксандр Ханеўскі пастанавіў спагнаць з Андрэя Аляксандрава і Дзьмітрыя Наважылава, агулам на дваіх — больш за мільён рублёў у дадатак да штрафаў паводле прысуду Менскага абласнога суду ад 2022 года (Аляксандраву — 1000 базавых велічынь, Наважылаву — 700).

Hашэньне аб ліквідацыі БелаПАН Эканамічны суд Менска прыняў 1 лютага 2024 году.

Па «справе БелаПАН» у студзені 2021 года былі затрыманыя экс-намесьнік дырэктара кампаніі БелаПАН Андрэй Аляксандраў і яго жонка Ірына Злобіна, праз паўгода — два дырэктары БелаПАН — Дзьмітрый Наважылаў, які заняў гэтую пасаду ў канцы 2018 года пасьля сьмерці заснавальніка кампаніі Алеся Ліпая, і Ірына Леўшына, якая ўзначальвала БелаПАН да арышту 18 жніўня 2021 года. 6 кастрычніка 2022 года судзьдзя Менскага абласнога суда Вячаслаў Тулейка пакараў Наважылава на 6 гадоў пазбаўленьня волі па ч. 1 арт. 3611 (Стварэньне экстрэмісцкага фарміраваньня) і ч. 2 арт. 243 (Ухіленьне ад выплаты падаткаў у буйным памеры) Крымінальнага кодэксу, Леўшыну — да чатырох гадоў зьняволеньня па ч. 1 арт. 361. Леўшына выйшла на свабоду 7 сьнежня 2024 г., Наважылаў павiнен вызвалiцца 7 сьнежня 2026 г.

Андрэй Аляксандраў быў асуджаны да 14 гадоў зьняволеньня, ягоная жонка Ірына Злобіна, якая ня мела дачыненьня да кампаніі БелаПАН, была асуджаныя на 9 гадоў, як і ён паводле абвінавачаная ў «здрады дзяржаве» (арт. 356) і «падрыхтоўцы грамадзян для ўдзелу ў беспарадках» (ч. 2 арт. 342).

  • Беларуская інфармацыйная кампанія БелаПАН была заснаваная ў 1991 годзе журналістам Алесем Ліпаем, які памёр у жніўні 2018 году.
  • У пачатку лістапада 2021 году КДБ унесла БелаПАН у сьпіс «экстрэмісцкіх фармаваньняў».
​
XS
SM
MD
LG