Палітвязень журналіст Дзяніс Івашын даслаў зь вязьніцы ліст, у якім расказаў пра некаторыя дэталі таго, як сустрэў у няволі Каляды.
Сымбалічная ялінка дала палітвязьню новую надзею на наступнае каляднае сьвята ўжо на волі, вынікае з паведамленьня «Вясны».
«Каляды я сустрэў з прыгожаю (як мне падаецца) ялінкаю-хваінкаю. Гэтым разам яна атрымалася ў мяне занадта пухнастай, тоўсьценькаю. Зь вялікаю Бэтлэемскаю зоркаю. Пакункі з падарункамі пад ёю — яшчэ не намаляваў. Але і гэтак зразумела, на які падарунак мы найбольш чакаем. Яго не загорнеш у сьвяточную абгортку з прыгожымі бантамі.
Дужа спадзяюся, што наступная ялінка будзе насамрэч жывою і ставіць яе мы ўжо будзем разам. Давядзецца, праўда, упрыгожаньні яшчэ набываць, але ж гэта прыемны працэс. Але калядная ялінка мае быць выключна — жывою», — напісаў Дзяніс Івашын у апошнім лісьце з вязьніцы.
- Журналіста Дзяніса Івашына трымаюць ва ўмовах строгага рэжыму ў турме № 8 у Жодзіне.
- Івашын асуджаны на 13 гадоў і 1 месяц зьняволеньня за нібыта «здраду дзяржаве» ( арт. 356 Крымінальнага кодэксу) і «незаконны збор і распаўсюд зьвестак аб прыватным жыцьці» ( арт. 179 КК).
- Да пераводу на турэмны рэжым у жодзінскай вязьніцы Дзяніс Івашын адбываў пакараньне ў магілёўскай калёніі № 15, дзе, як вядома праваабаронцам, на яго моцна ціснула адміністрацыя.
- Паводле тэлеграм-каналу @dzianisivashyn, палітвязьню ўжо 13 месяцаў не дазваляюць тэлефонных званкоў.
Форум