Такія цырымоніі прайшлі ў Берасьці, а таксама некалькіх раёнах Віцебскай і Магілёўскай вобласьці. Пра іх актыўна пішуць мясцовыя выданьні.
З публікацыі ўшацкай раённай газэты «Патрыёт» вынікае, што цяпер на тэрыторыі Беларусі ўжо створаныя і дзейнічаюць прыблізна 160 вайскова-патрыятычных клюбаў, якія аб’ядноўваюць больш за 5,5 тысячы хлопцаў і дзяўчат школьнага ўзросту.
Цырымоніі праводзяць на адзін узор. Для месца ўрачыстасьцяў выбіраюць музэі або гістарычныя аб’екты, зьвязаныя з Другой усясьветнай вайной (улады Беларусі па-ранейшаму выкарыстоўваюць савецкую назву — Вялікай айчынная вайна. — РС).
Ва Ўшачах гэтая ўрачыстасьць адбылася ў музэі народнай славы, у Берасьці — у Берасьцейскай крэпасьці, у Бялынічах Магілёўскай вобласьці — у мясцовым мастацкім музэі, у Расонах Віцебскай вобласьці — у музэі баявой садружнасьці. Прысягу ў дзяцей прымаюць прадстаўнікі мясцовых органаў унутраных справаў — начальнікі або іх намесьнікі ў ідэалягічнай працы і кадравым забесьпячэньні.
Дзецям разам з пасьведчаньнямі ўручаюць кодэкс гонару выхаванцаў клюбу — дакумэнт, які замацоўвае «прынцыпы гонару, дысцыпліны, патрыятызму і асабістай адказнасьці, што зьяўляюцца асновай службовай і грамадзянскай пазыцыі будучых абаронцаў Айчыны».
У канцы ўрачыстасьцяў мясцовыя праваслаўныя сьвятары праводзяць «чын асьвячэньня шыхту».
Форум