Правілы вызначаюць агульныя прынцыпы, згодна зь якімі мае вылічвацца памер камісійных збораў, паведамляе прэс-служба Нацыянальнага банку. Такая пастанова мае на мэце пашырэньне даступнасьці банкаўскіх паслуг і паляпшэньня якасьці абслугоўваньня фізычных і юрыдычных асоб.
Адна з ключавых зьменаў — абавязак банкаў загадзя інфармаваць сваіх кліентаў аб любых будучых зьменах ставак камісійных. Пры гэтым самі тарыфы павінны ўстанаўлівацца з улікам прынцыпу эканамічнай мэтазгоднасьці.
Гэта азначае, што банкі будуць абавязаныя разьлічваць памер узнагароджаньня на грунце сваіх фактычных выдаткаў на аказаньне паслугі і забесьпячэньня разумнага ўзроўню рэнтабэльнасьці, а не вызначаць яго адвольна.
У той жа час Нацыянальны банк значна пашырыў пералік банкаўскіх апэрацый, якія цяпер павінны даваць фізычным асобам задарма:
- пераказ сродкаў паміж рахункамі, адкрытымі ў адным банку;
- зьняцьце гатоўкі як у касе, так і праз банкаматы той самай крэдытнай установы;
- атрыманьне інфармацыі пра крэдытныя абавязкі і банкаўскія рахункі;
- замена картак у выпадку іх «кампрамэтацыі».
Для некаторых апэрацый, наадварот, устаноўлены дакладныя абмежаваньні:
- камісія за залічэньне беларускіх рублёў на рахункі грамадзян ня можа перавышаць 1,5% ад залічанай сумы;
- абсалютны памер камісіі абмежаваны 5 базавымі адзінкамі;
- абмежаваны памер узнагароджаньня за абмен пашкоджанай замежнай валюты, а таксама за прыём такой валюты для паступленьня, — ён не павінен перавышаць 5% ад агульнай сумы.
Рашэньне ўступае ў сілу 15 студзеня 2026 году. Нацыянальны банк спадзяецца, што новыя меры дапамогуць паменшыць фінансавую нагрузку на кліентаў банкаў і стварыць адзіныя, празрыстыя правілы для банкаўскіх паслуг.
Форум