Зьявілася пацьверджаньне арышту ў Беларусі лекара Бадамшына, які знаходзіўся на «хатняй хіміі»

Руслан Бадамшын. Архіўнае фота
Руслан Бадамшын. Архіўнае фота

Інфармацыю аб затрыманьні пацьвердзілі Свабодзе ў Фондзе мэдычнай салідарнасьці Беларусі.

Руслана Бадамшына ў траўні 2024 году асудзілі паводле арт. 342 Крымінальнага кодэксу Беларусі («Актыўны ўдзел у дзеяньнях, якія груба парушаюць грамадзкі парадак») на 3 гады абмежаваньня волі без накіраваньня ў папраўчую ўстанову адкрытага тыпу (так званую «хатнюю хімію»). Справу на яго завялі за фота з акцыяў пратэсту ў 2020 годзе ў Менску.

Гэта шостае затрыманьне лекара пасьля выбараў 2020 году. Да леташняга выраку ён правёў пад арыштам больш за 60 дзён.

Пасьля адміністрацыйнага арышту ў красавіку 2021 году Бадамшына звольнілі з Рэспубліканскага навукова-практычнага цэнтру нэўралёгіі і нэўрахірургіі, дзе ён працаваў лекарам функцыянальнай дыягностыкі. У той дзень, 8 красавіка, у 7:30 доктар быў вызвалены з жодзінскай турмы, дзе ён адбыў 15 дзён. Лекар вымушаны быў дабірацца ў Менск бяз грошай і тэлефона і зьявіўся на працу а 12-й гадзіне замест 10-й, што палічылі прагулам.

Да перасьледу Руслан Бадамшын працаваў лекарам-нэўролягам у мэдычным цэнтры «Нардзін». У сям’і Руслана Бадамшына двое дзяцей — 9 і 6 гадоў. У жніўні 2024 году паводле «народнага» артыкула 342 асудзілі і ягоную жонку Тацяну.

Раней выданьне «Наша Ніва» паведамляла, што гэтым разам Бадамшына арыштавалі з абвінавачаньнем у «садзейнічаньні экстрэмісцкай дзейнасьці» (артыкул 361-4 Крымінальнага кодэксу). Цяпер ён знаходзіцца ў СІЗА № 1.

​
XS
SM
MD
LG