На паведамленьне прэсавай службы Міністэрства працы і сацыяльнай абароны зьвярнуў увагу партал «Зеркало».
Законапраект датычыцца зьменаў у парадку выплаты ўзносаў у Фонд сацыяльнай абароны насельніцтва (ФСАН) як для індывідуальных прадпрымальнікаў (ІП), так і для тых, хто працуе паводле спэцыяльнага падатковага рэжыму — падатку на прафэсійны даход.
Для другой катэгорыі «на штогадовай аснове прадугледжана права даплаціць узносы на пэнсійнае страхаваньне ў бюджэт фонду сацабароны насельніцтва». Указана, што гэта будзе добраахвотнае рашэньне.
Для ІП, якія плацяць падаходны падатак, прапануецца наступная схема:
Калі гадавы даход прадпрымальніка складае менш за 12 мінімальных заробкаў (на пачатак чэрвеня гэта было да 8712 рублёў), ён зможа плаціць 35% ад фактычнага даходу, а не ад устаноўленага мінімуму. Цяпер жа незалежна ад даходу ІП абавязаны плаціць унёскі мінімум з 12 мінімальных заработных платаў (МЗП) у год (726 рублёў у месяц). Такім чынам, гэта паслабленьне для тых, хто зарабляе няшмат.
Калі ж даход за год роўны або перавышае 12 мінімальных заробкаў, то ўнёскі па-ранейшаму выплачваюцца ў памеры 35% ад гэтай сумы — альбо больш, калі прадпрымальнік сам захоча павялічыць сваю пэнсійную базу.
Для ІП на адзіным падатку зьменаў няма — яны абавязаныя выплачваць унёскі ня менш за 35% ад мінімальнай зарплаты за кожны месяц, калі плацяць адзіны падатак.
Усе даныя для разліку будуць паступаць аўтаматычна з падатковай службы (МПЗ), узаемадзеяньне з ФСАН цалкам аўтаматызуюць. Тэрмін выплаты гадавых узносаў пераносіцца з 1 сакавіка на 31 сакавіка наступнага году.
- Палата прадстаўнікоў прыняла законапраект аб унёсках у Фонд сацыяльнай абароны насельніцтва (ФСАН)у першым чытаньні 2 красавіка. Акрамя гэтага, адразу ў двух чытаньнях дэпутаты прынялі законапраект, які вызначае тэрмін забароны працаваць ІП тым, хто падчас працы індывідуальным прадпрымальнікам перавысіў гранічны памер выручкі.
Форум