«Я думаю, што гэта было жудасна. І мне сказалі, што яны зрабілі памылку. Я думаю, што гэта жахлівая рэч. Я думаю, што ўся гэтая вайна жахлівая рэч», — сказаў Трамп журналістам на борце Air Force One па вяртаньні ў Вашынгтон, піша AP. Ён не ўдакладніў, што меў на ўвазе пад выразам «зрабілі памылку».
Як паведамляе Генэральная пракуратура Ўкраіны, у Вербную нядзелю 13 красавіка каля 10:15 расейскія вайскоўцы нанесьлі два ракетныя ўдары па цэнтры гораду Сумы. На гэты момант вядома аб 34 загінулых і 117 параненых. Сярод загінулых двое дзяцей, 15 пацярпелых, піша Ўкраінская служба Радыё Свабода.
Паводле словаў прэзыдэнта Ўкраіны Ўладзіміра Зяленскага, у мэдычных установах знаходзяцца 68 пацярпелых, восем зь іх у цяжкім стане.
У абласной вайсковай адміністрацыі паведамілі, што ў выніку ўдару пашкоджаныя 55 будынкаў: навучальныя ўстановы, нежылыя дамы, жылыя дамы, у тым ліку прыватныя, аўтамабілі.
Наступствы ракетнай атакі Расеі на цэнтар гораду Сумы. ФОТА
Расейскія вайскоўцы рэгулярна атакуюць рэгіёны Ўкраіны з ужываннем розных відаў зброі — ударных дронаў, ракет, авіябомбаў, рэактыўных сыстэмаў залпавага агню.
Расейскае кіраўніцтва адмаўляе, што расейская армія падчас поўнамаштабнай вайны наносіць мэтанакіраваныя ўдары па цывільнай інфраструктуры гарадоў і вёсак Украіны, забіваючы мірных жыхароў і разбураючы лякарні, школы, дзіцячыя садкі, аб’екты энэрга- і водазабесьпячэньня.
Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы з боку РФ і падкрэсьліваюць, што яны маюць мэтанакіраваны характар.
У канцы сакавіка ААН змагла пацьвердзіць, што з пачатку году ва Ўкраіне праз расейскую агрэсію загінулі 413 мірных жыхароў і больш за 2000 атрымалі раненьні. За першыя тры месяцы 2025 году ахвяраў пабольшала на 30% у параўнаньні з аналягічным пэрыядам летась.
Форум