Генэральная пракуратура Літвы перадала ў суд крымінальную справу, у якой дваіх грамадзян Літвы абвінавачваюць у шпіянажы на карысьць Беларусі. Яны самі прапанавалі супрацоўнічаць зь беларускай выведкай, а адзін зь іх мэтанакіравана інфільтраваўся ў Літоўскі зьвяз стралкоў, паведамляе LRT.
Паводле зьвестак дасудовага расьсьледаваньня, у траўні 2022 году пара прыехала ў Менск, дзе праз пасярэдніка яны дамовіліся пра кантакты і далейшае супрацоўніцтва «з прадстаўнікамі вайсковых структур» Беларусі.
Пазьней у мэтах шпіянажу нібыта адзін з абвінавачаных уступіў у Літоўскі зьвяз стралкоў і стаў яго актыўным удзельнікам.
Сьледчыя заявілі, што сабралі дастаткова зьвестак, якія дазваляюць меркаваць, што пасьля той сустрэчы да свайго затрыманьня ў лістападзе 2023 году абвінавачаныя выконвалі заданьні Галоўнага выведнага ўпраўленьня (ГВУ) Генштабу Міністэрства абароны Беларусі, гаворыцца ў матэрыяле. На даручэньне беларускага ГВУ і за грашовую ці іншую ўзнагароду яны нібыта зьбіралі і перадавалі ў Літве і Латвіі інфармацыю, цікавую для беларускай выведкі.
Паводле матэрыялаў крымінальнай справы, беларускае ГРУ было зацікаўленае ў атрыманьні інфармацыі пра:
- вайсковую тэхніку і ўзбраеньне, якое дысьлякуецца ў Літве і належыць літоўскаму войску, добраахвотніцкім сілам нацыянальнай абароны, Літоўскаму зьвязу стралкоў і саюзьнікам па NATO;
- стратэгічную інфраструктуру аб’ектаў і іх ахову;
- дзейнасьць Літоўскага саюзу стралкоў і зьмест вучэньняў, якія ён праводзіў;
- пра дзейнасьць беларускай апазыцыі ў Літве і яе ўдзельнікаў,
- пра грамадзян Літвы, якія маглі б быць завэрбаваныя.
Адзначаецца, што, хаця інфармацыя, сабраная і перададзеная абвінавачанымі беларускаму ГВУ, як мяркуецца, не была засакрэчанай, яна мае каштоўнасьць для ўзброеных сіл замежных дзяржаў пры падрыхтоўцы плянаў ваеннай агрэсіі, а таксама выкарыстоўваецца для іншай дзейнасьці, накіраванай супраць Літвы.
Затрыманым выставілі абвінавачаньні, яны знаходзяцца пад арыштам, ім пагражае да 15 гадоў пазбаўленьня волі.
Форум