Былога супрацоўніка Менскай цэнтральнай мытні судзяць за «здраду дзяржаве»

14 люты 2025, 09:15

У Менскім гарадзкім судзе 14 лютага пачынаецца судовы працэс над жыхаром Менскага раёну Віктарам Вараб’ёвым, пра якога праваабаронцам вядома, што з 2018 году ён працаваў у Менскай цэнтральнай мытні інжынэрам сувязі.

«Вясна» паведамляе, што Віктара вінавацяць паводле пяці артыкулаў Крымінальнага кодэксу, якія праваабаронцы лічаць палітычнымі:

«Здрада дзяржаве» (ч. 1 арт. 356),
«Перавышэньне ўлады або службовых паўнамоцтваў» (ч. 1 арт. 426),
«Садзейнічаньне экстрэмісцкай дзейнасьці» (ч. 1 арт. 361-4),
«Удзел у экстрэмісцкім фармаваньні» (ч. 3 арт. 361-1),
«Грубае парушэньне грамадзкага парадку» (ч. 1 арт. 342).

Віктару Вараб’ёву пагражае да 15 гадоў зьняволеньня.

Вараб’ёву 29 гадоў, ён пражываў пад Менскам у пасёлку Ратамка. Суд над ім будзе закрытым, старшынём на працэсе будзе Сяргей Хрыпач, які вынес ужо больш за 50 палітычна матываваных прысудаў.