Наважылаву абвінавачваюць паводле «народнага» арт. 342 Крымінальнага кодэксу (арганізацыя і рыхтаваньне дзеяньняў, якія груба парушаюць грамадзкі парадак, або актыўны ўдзел у іх). З 2020 году ўлады шырока ўжываюць гэты артыкул для перасьледу ўдзельнікаў мірных акцыяў пратэсту.
Праваабарончы цэнтар «Вясна» і незалежныя СМІ мяркуюць, што судзіць будуць менавіта стваральніцу аднаго зь першых у Беларусі фітнэс-цэнтраў «Багіра», вядомую трэнэрку і тэлевядоўцу Натальлю Наважылаву. Яе зьвесткі цалкам супадаюць з інфармацыяй у раскладзе судовых паседжаньняў.
Наважылава нарадзілася ў 1955 годзе, яна майстар спорту ў спартовай гімнастыцы, чэмпіёнка СССР, старшыня міжнароднага грамадзкага аб’яднаньня «Фэдэрацыя фітнэсу», стваральніца Нацыянальнай школы фітнэс-трэнэраў, якія навучаліся ў «Багіры». Яе фітнэс-цэнтар наведвалі як вядомыя людзі, так і звычайныя аматары спорту, якім надавалі аднолькава якасныя паслугі. Таксама яна афіцыйная прадстаўніца фітнэс-праграмаў унівэрсытэту Reebok і Nike (USA).
З 1994 па 2001 год Натальля Наважылава была вядоўцай праграмы «Урокі з Натальляй Наважылавай» на тэлевізіі, падчас якой дэманстраваліся трэнаваньні ў фітнэсе.
Была ўзнагароджаная ганаровай граматай Лукашэнкі «За значны ўнёсак у прапаганду здаровага ладу жыцьця».
Згодна з адкрытымі крыніцамі, Наважылава была сяброўкаю грамадзкага абʼяднаньня «Гавары праўду», на выбарах у мясцовыя саветы 2018 году была даверанай асобай палітыка Тацяны Караткевіч. У 2019 годзе балятавалася кандыдаткай у дэпутаты Палаты прадстаўнікоў, аднак яе кандыдатуру не зарэгістравалі.
На прэзыдэнцкіх выбарах 2020 году Наважылава была даверанай асобай кандыдата Андрэя Дзьмітрыева.
Форум