Пасьля таго як Трамп быў прыведзены да прысягі, ён выступіў з прамовай, у якой паабяцаў зрабіць хуткія рашучыя крокі, «каб зрабіць Амэрыку зноў вялікай».
Ён абвясьціў, што адразу ж прыме шэраг указаў, мэтай якіх, у прыватнасьці, будзе:
- Абвясьціць надзвычайную сытуацыю на паўднёвых межах ЗША і паслаць войскі на мяжу.
- Вярнуць «мільёны крымінальных элемэнтаў» туды, адкуль яны прыехалі, анансаваўшы палітыку «Заставайцеся ў Мэксыцы».
- Абвясьціць крымінальныя картэлі замежнымі тэрарыстычнымі арганізацыямі.
- Зьнізіць інфляцыю, цэны і кошт жыцьця.
- Дазволіць распрацоўку новых радовішчаў нафты і газу.
- Зноў выйсьці з Парыскай дамовы аб клімаце.
- Стварыць вонкавую падатковую службу, якая будзе займацца зборам тарыфаў на імпарт.
- Аднавіць на службе тых вайскоўцаў, якія адмаўляліся ад вакцынацыі.
- Перайменаваць Мэксыканскую затоку ў Амэрыканскую затоку.
- Вярнуць гары на Алясцы імя прэзыдэнта Мак-Кінлі.
Трамп таксама заявіў, што Злучаныя Штаты павінны вярнуць сабе Панамскі канал, пашырыць тэрыторыю ЗША, а амэрыканскія астранаўты паставяць амэрыканскі сьцяг на Марсе. У сваёй прамове Трамп не згадаў Украіну, але паабяцаў быць «міратворцам».
«Голас Амэрыкі» правядзе жывую відэатрансьляцыю першых гадзінаў прэзыдэнцтва Трампа.
Раней «Голас Амэрыкі» правёў жывую відэатрансьляцыю з інаўгурацыі.
Тут можна пачытаць тэкставую трансьляцыю «Голасу Амэрыкі».
Гэта другі раз, калі Трамп зойме гэтую пасаду — пасьля таго як ён ужо займаў пасаду прэзыдэнта перад Джо Байдэнам у 2017–2021 гадах.
У 2025 годзе, упершыню за 40 гадоў, інаўгурацыя праходзіць у памяшканьні з прычыны марозу.
Дональд Трамп стаў першым прэзыдэнтам больш як за стагодзьдзе, які запрасіў на цырымонію прысягі замежных лідэраў. Звычайна зь іншаземцаў прысутнічаюць толькі дыпляматы.
Як праходзілі інаўгурацыі прэзыдэнтаў ЗША апошнія 100 гадоў. ФОТА