Мінабароны Беларусі пацьвердзіла факт зьнішчэння цэляў, якія заляцелі ў Беларусь у ноч на 5 верасьня.
«Сёньня ноччу, 5 верасьня, быў зафіксаваны факт парушэньня дзяржаўнай мяжы Рэспублікі Беларусь у паветранай прасторы, як мяркуецца, бесьпілётнымі лятальнымі апаратамі», — паведаміла прэс-служба Міністэрства абароны са спасылкай на начальніка галоўнага штабу – першага намесьніка камандуючага ВПС і войскамі СПА Сяргея Фралова.
«Было прынятае рашэньне на іх зьнішчэньне. Своечасовымі дзеяньнямі дзяжурных сіл супрацьпаветранай абароны ўсе цэлі парушальнікаў былі зьнішчаныя. Па гэтым факце праводзіцца праверка», — заявіў афіцэр.
Спачатку два ўкраінскія тэлеграм-каналы monitor і «Николаевский Ванёк» паведамілі пра тое, што на тэрыторыю Беларусі заляцелі два расейскія бесьпілётнікі. «Шахеды» накіраваліся ў бок Гомля.
Уначы «Чат дорожных происшествий» паведаміў пра тое, што над Гомлем падаюць зьбітыя БПЛА. Там сама зьявіліся відэа меркаванага зьбіцьця дронаў.
«Флагшток» адзначае, што, а 23-й гадзіне над горадам лятаў самалёт, як мяркуецца, зьнішчальнік Узброеных сілаў Беларусі. Таксама СМІ паведаміла пра меркаваныя месцы падзеньня зьбітых дронаў.
«Папярэдняе месца падзеньня рэштак аднаго расейскага БПЛА па зьвестках геалякацыі і паведамленьнях карыстальнікаў у гарадзкіх чатах — Навабеліцкі раён у квартале завулкаў 6-ы і 8-ы Ільліча. Паводле інфармацыі „Флагштоку“, недалёка ад названага месца на вул. 3-й Транзытнай пажарная каманда тушыла невялікае ўзгараньне.
Таксама з раённага чату ёсьць інфармацыя аб тушэньні пажару ў тым жа раёне па вуліцы Белага: „На Хутары ў прыватным сэктары, за крамай „Суседзі“, затушылі».
Пазьней «Николаевский Ванёк» паведаміў пра яшчэ адзін расейскі дрон у кірунку Хойнікаў.
«Сыстэма апавяшчэньня, якую бесьперапынна мантуюць і выпрабоўваюць з 2022 году, не змагла папярэдзіць гамяльчан падчас атакі расейскімі БПЛА», — зазначыў «Флагшток».
Гэтую інфармацыю пацьвярджае і дасьледніцкі праект «Беларускі Гаюн».
У выніку падзеньня абломкаў зьбітага бесьпілётніка загарэўся склад у Гомлі на 8-м завулку Ільіча. Аб гэтым паведаміла прэс-служба МНС.
«Падразьдзелы МНС зьліквідавалі пажар. Ніхто не пацярпеў. Агнём пашкоджана 5 кв. мэтраў даху», — паведаміла прэс-служба ведамства.
Начныя падзеі ў Гомлі пракамэнтавала і кіраўніца Аб’яднанага пераходнага кабінэту Сьвятлана Ціханоўская. Яна адзначыла, што «нават прапаганда рэжыму» ўжо ня можа хаваць таго, што «вайна адчуваецца ўсё мацней».
Форум