У Менску пачаліся суды над вядомым вандроўнікам-раварыстам і фігурантам «тэрарыстычнага сьпісу»

Пачалі судзіць вядомага вандроўніка-раварыста

29 ліпеня ў судзе Фрунзэнскага раёну Менску пачаўся працэс над вандроўнікам-раварыстам, адміністратарам тэлеграм-чату «Беларусы на Шры-Ланцы» Віктарам Чайкам.

Паводле праваабаронцаў «Вясны», Віктару Чайку інкрымінуюць ч. 1 артыкул 342 Крымінальнага кодэксу («Актыўны ўдзел у дзеяньнях, што груба парушаюць грамадзкі парадак»).

Віктару Чайку 42 гады, ён актыўны вандроўнік, наведаў на ровары шмат краінаў сьвету. На YouTube Віктар Чайка вёў канал «Диалоги о мире» з 349 падпісчыкамі і канал «Я — Виктор», дзе паведамляў 10 падпісчыкам і наведнікам, што ён «катаецца на ровары зь ветрыкам і здымае пра гэта фільмы».

Вандроўкі Віктара Чайкі спыніліся ў траўні пасьля яго на затрыманьня. Цяпер мужчыну пагражае да 4 гадоў зьняволеньня. Справу будзе весьці судзьдзя Юлія Крэпская.

ГЛЯДЗІЦЕ ТАКСАМА:

Палітвязьням, у якіх заканчваюцца тэрміны, прапанавалі напісаць прашэньні аб памілаваньні

Фігуранта «сьпісу тэрарыстаў» судзяць адразу паводле пяці артыкулаў

Таксама ў Менскім абласным судзе 29 ліпеня пачаўся працэс над Уладзімерам Баслыкам, якога ўнесьлі ў сьпіс асобаў, «датычных да тэрарыстычнай дзейнасьці».

Паводле «Вясны», Уладзімера Баслыку затрымалі за камэнтары і абвінавачваюць паводле пяці артыкулаў Крымінальнага кодэксу:
361-га («Заклікі да дзеяньняў, скіраваных на прычыненьне шкоды нацыянальнай бясьпецы Рэспублікі Беларусь»), 369-га («Абраза прадстаўніка ўлады»), 368-га («Абраза прэзыдэнта Рэспублікі Беларусь»), 130-га («Распальваньне сацыяльнай ці іншай варожасьці») і 367-га («Паклёп на прэзыдэнта»).

Вядома, што мужчыну 42 гады, яму пагражае да 12 гадоў калёніі.

Судзьдзёй на працэсе будзе Анжаліка Данілава.

ГЛЯДЗІЦЕ ТАКСАМА:

Хроніка перасьледу 18 ліпеня: Беларуса з «тэрарыстычнага сьпісу» будуць судзіць паводле 5 крымінальных артыкулаў