Пастаянныя прадстаўнікі дзяржаў-чальцоў Эўразьвязу ўвечары 14 чэрвеня прынцыпова ўхвалілі рамкі перамоваў аб уступленьні ў ЭЗ Украіны і Малдовы, паведамілі крыніцы Радыё Свабода і ўкраінскія СМІ са спасылкай на бэльгійскае старшынства ў Радзе Эўразьвязу.
Рашэньне амбасадараў ЭЗ азначае, што 25 чэрвеня, як і плянавалася, адбудзецца міжурадавая канфэрэнцыя, якая дасьць афіцыйны старт перамовам аб уступленьні Украіны і Малдовы ў ЭЗ, канстатуе «Українська правда».
Канец чэрвеня быў чаканай датай правядзеньня міжурадавай канфэрэнцыі — менавіта ў гэтым месяцы завяршаецца старшынства Бэльгіі ў Радзе ЭЗ.
Вугоршчына на ўзроўні сваіх пастаянных прадстаўнікоў у Брусэлі блякавала прыняцьце рашэньня. У выпадку, калі б яна не зьмяніла гэтую пазыцыю, адкрыцьцё перамоваў магло б зацягнуцца на другое паўгодзьдзе 2024 году, калі старшынстваваць у Радзе ЭЗ па ратацыі будзе Вугоршчына.
7 чэрвеня Эўрапейская камісія пацьвердзіла, што дала станоўчую вусную ацэнку прагрэсу эўраінтэграцыйных рэформаў Украіны і Малдовы, выкладзеных у лістападаўскай справаздачы аб пашырэньні ЭЗ.
Сам па сабе пачатак перамоваў не азначае хуткага прыёму Ўкраіны і Малдовы ў Эўразьвяз. Старшыня Эўрапейскай Рады Шарль Мішэль дапусьціў, што Ўкраіна можа стаць сябрам ЭЗ да 2030 году, «калі абодва бакі выканаюць хатнія заданьні».
Форум