Пракуратура Маскоўскага раёну Менску запатрабавала ад трох буйных інтэрнет-крамаў прыбраць кнігі Вацлава Ластоўскага і Віктара Суворава, заўважыла выданьне Reform.by.
Раней яны былі ўнесены ў рэспубліканскі сьпіс «экстрэмісцкіх матэрыялаў».
Кнігі Віктара Суворава «Дзень „М“. Калі пачалася Сусьветная вайна?» і «Ледакол. Хто пачаў Другую сусьветную вайну?» былі знойдзеныя ў дзьвюх крамах, а «Выбраныя творы» Вацлава Ластоўскага — яшчэ ў адной краме.
Прадпісаньне пракуратуры выканалі.
- У Рэспубліканскім сьпісе экстрэмісцкіх матэрыялаў, які знаходзіцца на сайтах некаторых дзяржаўных органаў, унесены тысячы найменьняў друкаванай прадукцыі, сайтаў і тэлеграм-каналаў, маркі, значкі, CD-дыскі. Сьпіс папаўняецца амаль штодзённа.
- Так, раней «экстрэмісцкімі» прызналі творы клясыка беларускай літаратуры Вінцэнта Дунін-Марцінкевіча, некаторыя творы Ўладзімера Арлова, Альгерда Бахарэвіча, Уладзімера Някляева, іншых беларускіх літаратараў, кнігу «Адысея капiтана БНР» гомельскага журналіста Анатоля Гатоўчыца.
«Экстрэмісцкімі матэрыяламі» прызнаныя: - Дунін-Марцінкевіч, В. Збор твораў. У 2 т. Т.1 Драматычныя творы, вершаваныя аповесьці і апавяданьні / Вінцэнт Дунін-Марцінкевіч; [уклад. з тэкст. падрыхт., прадм., перакл. і камэнт. Я. Янушкевіча]. — Менск: Мастацкая літаратура, 2007.— 494 с.
- Дунін-Марцінкевіч, В. Збор твораў. У 2 т. Т.2 Вершаваныя аповесьці і апавяданьні, вершы, публіцыстыка, лісты і пасланьні, пераклады, Dubia / Вінцэнт Дунін-Марцінкевіч; [уклад. з тэкст. падрыхт., пер. Я. Янушкевіча]. — Менск: Мастацкая літаратура, 2008. — 598 с.
- У жніўні 2023 году «экстрэмісцкімі матэрыяламі» на просьбу пракуратуры Менску прызналі прадмову Язэпа Янушкевіча да кнігі выдавецтва «Беларускі кнігазбор» «Вінцэнт Дунін-Марцінкевіч. Выбраныя творы» і два вершы Дунін-Марцінкевіча — «Плывуць вятры» і «Гутарка старога дзеда». Гэтыя вершы клясык беларускай літаратуры напісаў перад паўстаньнем Кастуся Каліноўскага супраць расейскага імпэрскага прыгнёту на беларускіх землях.
Форум