«Шпіталізацыя спатрэбілася 15 чалавекам, зь іх 6 — супрацоўнікі праваахоўных органаў, 5 — грамадзяне», — паведаміў міністар аховы здароўя Грузіі Міхаіл Сарджвэладзэ.
Паводле міністра, у пацярпелых «розная ступень пашкоджаньняў, таму ў кагосьці лячэньне праходзіць значна лягчэй, у кагосьці можа быць працяглым, але гэтыя траўмы не зьяўляюцца сурʼёзнымі і небясьпечнымі для жыцьця».
Тысячы чалавек сабраліся ўвечары 1 траўня ля парлямэнту Грузіі, патрабуючы адклікаць закон, які ў народзе празвалі «расейскім». Удзельнікі акцыі пратэсту супраць закону аб «іншаземных агентах», а таксама праваабаронцы і іншыя назіральнікі заяўляюць, што мітынг быў мірны, а прадстаўнікі спэцатраду МУС ужылі непрапарцыйную сілу падчас яго разгону, піша грузінская служба Радыё Свабода «Эхо Кавказа».
Паводле МУС Грузіі, дэманстранты спрабавалі ўварвацца ў будынак парлямэнту. Спэцназ прымяніў вадамёты, сьлезацечны газ і пярцовы спрэй да дэманстрантаў каля службовых уваходаў у будынак. Паведамлялася таксама пра факты выкарыстаньня гумовых куляў. І хоць СМІ паказвалі кадры пацярпелых ад іх, у МУС Грузіі адмаўляюць выкарыстаньне гумовых куляў супраць пратэстоўцаў, «нягледзячы на тое, што былі ўсе законныя падставы для іх прымяненьня».
У той жа час розныя СМІ распаўсюдзілі кадры, на якіх паліцыянты выкарыстоўваюць грубую сілу супраць удзельнікаў акцыі, у прыватнасьці штурхаюць іх, кідаюць на зямлю і нават бʼюць па твары. Таксама былі пабітыя апазыцыйныя дэпутаты — лідэр «Нацруху» Леван Хабеішвілі і лідэр партыі «Макалаке» («Грамадзяне») Алека Элісашвілі.
63 затрыманыя пратэстоўцы — такая статыстыка МУС Грузіі пасьля разгону дэманстрацыі ў ноч на 1 траўня.
У парлямэнце Грузіі паведамілі пра чырвоны ўзровень небясьпекі, які будзе дзейнічаць 2 траўня на тэрыторыі заканадаўчага органу да 14:00. Падчас яго дзеяньня ў парлямэнт не дапусьцяць нікога, за выключэньнем асобаў, вызначаных кіраўніком апарату парлямэнту. Супрацоўнікаў парлямэнту пусьцяць у будынак толькі пасьля таго, як набудзе моц жоўты ўзровень бясьпекі.
Заплянаваныя ў парлямэнце мерапрыемствы — бюро і пленарныя пасяджэньні — адмянілі, паведамляюць у прэс-цэнтры парлямэнту, піша «Эхо Кавказа».
Цяпер на тэрыторыі парлямэнту «вядуцца работы па прыбіраньні і рэстаўрацыі» будынку. «1 траўня ў выніку нападу ўдзельнікаў акцыі пратэсту на Палац парлямэнту Грузіі будынку і інфраструктуры парлямэнту была нанесеная шкода», — гаворыцца ў заяве прэс-цэнтру.
Форум