Колішні міністар унутраных спраў Беларусі Ігар Шуневіч, які цяпер ачольвае Беларускае таварыства паляўнічых і рыбаловаў, заявіў аб перападрыхтоўцы сяброў гэтай грамадзкай арганізацыі на снайпэраў.
«Калі паставілі задачу — вызначыць сваё месца ў сыстэме нацыянальнай бясьпекі менавіта тых людзей, узброеных, якія сёньня складаюць аснову Беларускага таварыства паляўнічых і рыбаловаў, на добраахвотніцкай аснове, [я] накіраваў ліст, каб паведамілі, хто жадае... Я вам так скажу, па сакрэце, колькасьць ахвотных прайсьці перападрыхтоўку па сыстэме „снайпэр“ [...] перавысіла ўсе мае чаканьні», — сказаў Ігар Шуневіч у інтэрвію тэлеканалу СТВ.
Паводле яго, ужо створана сыстэма задзейнічаньня такіх спэцыялістаў.
«Іх перанавучаньне Міністэрства абароны ўжо арганізавала. І мы будзем паступова павялічваць патэнцыйную колькасьць тых людзей, якія ў выпадку неабходнасьці могуць быць выкарыстаныя як спэцыялісты вельмі вузкага прызначэньня, „хірургічнага“, так бы мовіць, інструмэнта ў ваенных дзеяньнях», — дадаў ён.
Ігар Шуневіч паведаміў, што ён і сам «ахвотна адклікнуўся» на такую магчымасьць. «Мы, безумоўна, давядзём свае навыкі да дасканаласьці нарэшце», — сказаў экс-міністар.
Ён удакладніў, што Беларускае таварыства паляўнічых і рыбаловаў у сваім шэрагах налівае каля 60 тысяч сяброў.
У лістападзе 2023 году Ігар Шуневіч заяўляў, што паляўнічых могуць выкарыстоўваць у якасьці снайпэрскага прыкрыцьця.
Форум