Ізраільскай ракеце ўдалося паразіць сыстэмы супрацьпаветранай абароны Ірану без выяўленьня іранскімі радарамі. Аб гэтым паведамляе The New York Times са спасылкай на крыніцы.
Па словах суразмоўцаў газэты, атака была накіраваная на тое, каб паслаць Ірану сыгнал, паводле якога Ізраіль можа абысьці яго сыстэмы абароны і паралізаваць іх.
Дзьве іранскія крыніцы распавялі The New York Times, што Ізраілю ўдалося паразіць радар сыстэмы СПА С-300, дысьлякаванай на вайсковай базе «Шыкары» ў Ісфахане.
Аб тым, што мэтай атакі, па ўсёй верагоднасьці, быў радар, паведамляюць таксама журналісты расьсьледавальнікі, якія прааналізавалі спадарожнікавыя здымкі. На іх бачна, што сам пашкоджаны радар застаецца на месцы, але іншыя часткі ўстаноўкі прыбраныя.
Крыніцы ў амэрыканскай разьведцы сьцьвярджаюць, што ізраільскі ўдар дасягнуў сваёй мэты.
Была скарыстаная як мінімум адна ракета, выпушчаная са зьнішчальніка. Пры гэтым крыніцы газэты паведамілі, што іранскія сыстэмы СПА не змаглі выявіць нічога, што ўрывалася ў паветраную прастору Ірану — ні ракет, ні бесьпілётнікаў, ні зьнішчальнікаў.
Тэгеран са свайго боку працягвае сьцьвярджаць, што на месцы, дзе стаіць С-300 пад Ісфаханам, няма ніякіх разбурэньняў.
Пра тое, што Ізраіль мог нанесьці ўдар па Іране ў адказ на нядаўнюю атаку сваёй тэрыторыі, стала вядома 19 красавіка. Пра гэта паведаміў афіцыйны прадстаўнік ЗША, удакладніўшы, што Вашынгтон у нападзе ўдзелу не прымаў.
У ноч на 14 красавіка Іран атакаваў Ізраіль бесьпілётнікамі і ракетамі. Гэта было зроблена, як сьцьвярджае Тэгеран, у адказ на ракетны ўдар па будынку, які належыць іранскаму консульству ў Дамаску 1 красавіка. У бок Ізраіля было выпушчана каля 170 бесьпілётнікаў і 150 крылатых і балістычных ракет. Амаль усе яны былі перахопленыя вайскоўцамі Ізраіля, ЗША і Ярданіі.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў. Аднак ужо неўзабаве гэты мірны плян правалілі.
- 8 кастрычніка на пасярэдніцкіх перамовах у Эгіпце два бакі ў чарговы раз дамовіліся пра спыненьне агню. Гэта першая частка годы, распрацаванай адміністрацыяй прэзыдэнта Злучаных Штатаў Дональда Трампа.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.