Лінкі ўнівэрсальнага доступу

Звольнілі дырэктара Музычнага тэатру, дзе прасьпявалі песьню «Перамен!» гурту «Кіно»


Сяргей Пукіта
Сяргей Пукіта

Дырэктар Музычнага тэатру Сяргей Пукіта звольнены са сваёй пасады. Яго прозьвішча зьнікла са старонкі з імёнамі кіраўнікоў на сайце калектыву.

Пра гэта паведамляе партал «Зеркало». Крыніца парталу пацьвердзіла, што 21 сакавіка ў Пукіты быў апошні працоўны дзень.

Мяркуецца, што прычынай звальненьня стала выкананьне песьні «Перамен!» савецкага рок-гурту «Кіно». 16 сакавіка ў Музычным тэатры выступаў Сымфанічны аркестар Варонескай канцэртнай залі з праграмай «Анталёгія расейскага року», у рэпэртуары якога якраз ёсьць гэтая песьня.

17 сакавіка тэлеграм-канал «МотолькоПомоги» апублікаваў аўдыёзапіс выступу і рэакцыі залі. Паводле зьвестак каналу, аркестру «падпявала літаральна ўся заля».

«Заля падтрымала выступ з гэтай кампазыцыяй, стоячы зь ліхтарыкамі», — расказала «Зеркалу» крыніца, знаёмая з сытуацыяй.

Пасьля гэтага было прынятае рашэньне звольніць Пукіту.

Цяпер выканаўцам абавязкаў дырэктара прызначаны Генадзь Місуна, які да гэтага займаў пасаду намесьніка дырэктара.

  • Сяргей Пукіта ўзначальваў Музычны тэатар з 2019 году. Ён нарадзіўся ў 1978 годзе, у 1998-м скончыў Магілёўскую вучэльню культуры, у 2003-м — сталічны Ўнівэрсытэт культуры і мастацтваў.
  • З 2004 году працаваў у сталічным Моладзевым тэатры (з 2010-га быў там намесьнікам дырэктара), а таксама актыўна здымаўся ў кіно. Часьцей за ўсё граў супрацоўнікаў праваахоўных органаў, чыноўнікаў ці прадстаўнікоў працоўных прафэсій.

Чаму і калі песьня стала непажаданай уладам?

6 жніўня 2020 году Кірыл Галанаў і Ўладзіслаў Сакалоўскі на афіцыйным праўладным мерапрыемстве ў Кіеўскім сквэры ў Менску ўключылі песьню «Перамен!» групы «Кіно». На наступны дзень іх асудзілі на дзесяць сутак паводле арт. 17.1 (Дробнае хуліганства) і арт. 23.4 КаАП (Непадпарадкаваньне патрабаваньню службовай асобы). Пасьля сканчэньня адміністрацыйнага арышту Кірыл і Ўладзіслаў зьехалі з краіны, баючыся крымінальнага перасьледу.

Песьня стала адным зь неафіцыйных гімнаў пратэстаў 2020 году.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG