Лінкі ўнівэрсальнага доступу

Міграцыйны дэпартамэнт Літвы ануляваў дазвол на жыхарства беларусу, які абразіў у Youtube літоўцаў


Беларус і блогерка Юлія. Скрын з Youtube
Беларус і блогерка Юлія. Скрын з Youtube

Згодна зь літоўскім заканадаўствам беларус можа абскардзіць скасаваньне дазволу на жыхарства цягам 14 дзён.

Міграцыйны дэпартамэнт Літвы ануляваў дазвол на жыхарства грамадзяніну Беларусі, які працаваў у Літве і абразіў літоўцаў сваімі выказваньнямі, зробленымі ў інтэрвію праз Youtube дзяўчыне з Казахстану.

Як паведаміла выданьне tv3.lt, дазвол на жыхарства анулявалі не за выказваньні, а за парушэньне беларусам, якога завуць Максім, працоўнага заканадаўства Літвы — ён працуе не ў таго наймальніка, якога задэкляраваў.

Паводле выданьня, дырэктарка міграцыйнага дэпартамэнту Літвы Эвеліна Гудзінскайце паведаміла, што кансультацыі аб прызнаньні гэтага грамадзяніна Беларусі «пагрозай нацыянальнай бясьпецы» яшчэ працягваюцца з Дэпартамэнтам дзяржаўнай бясьпекі.

Згодна зь літоўскім заканадаўствам беларус можа абскардзіць скасаваньне дазволу на жыхарства цягам 14 дзён.

На пачатку сакавіка літоўскае выданьне delfi.lt зьвярнула ўвагу на выказваньні беларуса, зробленыя ў інтэрвію празь Youtube дзяўчыне з Казахстану, якая выйшла замуж за літоўца і жыве ў Літве.

У прыватнасьці, Максім заявіў, што прынцыпова не вывучае літоўскую мову, яму не падабаецца ні Літва, ні яе ўлада, ні законы, ні цэны.

«Навошта мне літоўская? Я літоўскую мову наогул не паважаю. У мяне ёсьць дазвол на жыхарства, але мова мне не патрэбная», — сказаў малады чалавек, які пражывае ў Літве з 2019 году.

Малады чалавек акцэнтаваў, што вітаецца з усімі па-расейску, ён лічыць, што людзі мусяць зразумець, што ён не мясцовы. Ён таксама заяўляў, што не паважае літоўцаў.

Пасьля рэзанансу відэазапіс з каналу Mylimiausia Lietuva на Youtube зьнік. Выявілася, што прыбраць яго папрасіў сам герой гісторыі, калі яму паведамілі, што Міграцыйны дэпартамэнт пачаў расьсьледаваньне ягонай справы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG