Падчас прэс-канфэрэнцыі міністар замежных спраў Іван Гіль абвясьціў аб рашэньні, заявіўшы, што офіс адыграў «неналежную ролю» і стаў «прыватнай юрыдычнай фірмай змоўшчыкаў дзяржаўнага перавароту і тэрарыстаў, якія пастаянна ладзяць змову супраць дзяржавы», піша Agence France-Presse.
Ён дадаў, што рашэньне будзе заставацца ў сіле, пакуль офіс публічна ня выправіць сваю «каляніялісцкую і абразьлівую пазыцыю, што парушае Статут Арганізацыі Аб’яднаных Нацый».
Аб’ява прагучала пасьля таго, як офіс у правах чалавека раскрытыкаваў рашэньне ўладаў Вэнэсуэлы затрымаць адваката Росіё Сан Мігель. Урад затрымаў яе, як было сказана, за яе ўдзел у меркаванай змове «з мэтай забойства прэзыдэнта Нікаласа Мадура пры падтрымцы ЗША».
Упраўленьне ў правах чалавека заклікала Вэнэсуэлу на плятформе X неадкладна вызваліць Сан Мігель і даць ёй права на юрыдычную абарону.
Адвакатку затрымалі ў аэрапорце недалёка ад Каракасу, калі яна чакала рэйсу ў Маямі з дачкой. Прычым затрыманьне адбылося на два дні раней, чым аб гэтым афіцыйна аб’явілі. Таксама былі затрыманыя члены сям'і Сан Мігель, у тым ліку яе дачка, былы муж, два браты і былы партнэр. Яе былы партнэр дагэтуль знаходзіцца пад вартай, астатніх адпусьцілі
Напярэдадні прэзыдэнцкіх выбараў найвышэйшая судовая інстанцыя ў мінулым месяцы не зарэгістравала канкурэнтку Мадура ад апазыцыі Марыю Карыну Мачада, што выклікала міжнародную крытыку. ЗША заявілі, што пераглядзяць палітыку санкцый супраць Вэнэсуэлы.
