Лінкі ўнівэрсальнага доступу

Упершыню праваслаўная краіна легалізавала аднаполыя шлюбы


У парлямэнце Грэцыі пасьля галасаваньня ў падтрымку закону аб аднаполых шлюбах, 15 лютага 2024
У парлямэнце Грэцыі пасьля галасаваньня ў падтрымку закону аб аднаполых шлюбах, 15 лютага 2024

Рашэньне ўхваліла Грэцыя.

Парлямэнт Грэцыі 15 лютага прагаласаваў за легалізацыю аднаполых шлюбаў і ўсынаўленьне дзяцей аднаполымі сем’ямі.

Як паведаміла BBC, Грэцыя стала 37-й краінай у сьвеце і першай праваслаўнай краінай, якая ўзаконіла аднаполыя шлюбы. Новы закон падтрымалі 176 з прысутных 245 дэпутатаў парлямэнту Грэцыі.

Закон прасоўваў асабіста прэмʼер-міністар Кірыякас Міцатакіс, лідэр кансэрватыўнай партыі «Новая дэмакратыя». Пры гэтым супраць легалізацыі аднаполых шлюбаў выступалі дзясяткі дэпутатаў ад партыі прэмʼера, аднак закон падтрымалі дэпутаты ад апазыцыі, у тым ліку ад левай партыі «Сірыза», лідэр якой зьяўляецца прадстаўніком ЛГБТ.

«Гэта гістарычная вяха ў справе забесьпячэньня правоў чалавека, якая адлюстроўвае сёньняшнюю Грэцыю — прагрэсіўную, дэмакратычную краіну, якая горача верыць у эўрапейскія каштоўнасьці», — напісаў прэмʼер-міністар Міцатакіс у сацсетках.

Выступаючы ў парлямэнце ў часе дэбатаў, Міцатакіс сказаў, што новы закон значна палепшыць жыцьцё даволі многіх суграмадзян, нічога не адбіраючы ў большасьці.

Грэцкая (Эладзкая) праваслаўная царква, якая мае ў краіне дзяржаўны, канстытуцыйны статус пераважнай рэлігіі і карыстаецца аўтарытэтам сярод многіх дэпутатаў партыі Міцатакіса, выступае рашуча супраць легалізацыі аднаполых шлюбаў.

Кіраўнік царквы, арцыбіскуп Атэнскі і ўсёй Элады Геранім II, заявіў, што новы закон — гэта спроба навязаць краіне новыя рэаліі, якія руйнуюць тканіну грамадзтва.

Грэцыя легалізавала аднаполыя цывільныя саюзы ў 2015 годзе.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG