Лінкі ўнівэрсальнага доступу

Хроніка перасьледу 9 лютага: у Менску асудзілі мастачку; у Бабруйску сілавікі прыходзяць на назіральнікаў на выбарах 2020-га


Ілюстрацыйнае фота
Ілюстрацыйнае фота

Рэпрэсіі ў Беларусі працягваюцца.

Праваабарончы цэнтар «Вясна» паведамляе, што ў Бабруйску сілавікі прыходзяць да людзей, якія былі затрыманыя пасьля выбараў ці былі на іх назіральнікамі.

У бабруйчан глядзяць тэлефоны і правяраюць падпіскі ў сацсетках. Праваабаронцам вядома пра сама меней 15 чалавек, да якіх прыходзілі міліцыянты.

У Менску за ўдзел у акцыі пратэсту на 3 гады «хатняй хіміі» асудзілі мастачку

У судзе Кастрычніцкага раёна Менска 8 лютага вынесены прысуд 32-гадовай мастачцы Ганьне Крук.

Жанчыну абвінавацілі ў арганізацыі і падрыхтоўцы дзеяньняў, якія парушылі грамадзкі парадак, альбо ўдзеле ў іх паводле ч. 1 арт. 342 КК, паведамляе «Вясна». Справу разглядала судзьдзя Іна Сівец.

Ганну затрымалі ўвечары 29 лістапада 2023 году ў кавярні «Маркс» у Менску. Праз два дні яе арыштавалі на 13 дзён у адміністрацыйнай справе паводле арт. 24.23 КаАП («Несанкцыянаванае пікетаваньне»). Згодна з пратаколам, Ганна «дэманстравала карціну з БЧБ-сьцягам, што стала даступна неабмежаванаму колу асоб».

Сваёй віны Крук не прызнала і патлумачыла суду, што сапраўды разьмясьціла ў кавярні сваю карціну, але на ёй няма выявы бел-чырвона-белага сьцяга. Пасьля «сутак» яна ня выйшла на волю: яе абвінавацілі ва ўдзеле ў акцыі пратэсту ў 2020 годзе.

Пэнсіянэра асудзілі за ўдзел у Маршы – яго знайшлі па фатаздымку ў перапісцы знаёмай

9 лютага стала вядома, што ў судзе Ленінскага раёна Менска 18 студзеня да двух з паловай гадоў «хатняй хіміі» за ўдзел у кастрычніцкай акцыі пратэсту ў 2020 годзе асудзілі пэнсіянэра Васіля Рубцова, паведамляе «Вясна». Яго знайшлі па фатаздымку ў перапісцы яго знаёмай, калі аглядалі яе тэлефон.

Судзьдзя Марына Клімчук прызнала яго вінаватым паводле ч. 1 арт. 342 Крымінальнага кодэкса (актыўны ўдзел у дзеяньнях, якія груба парушаюць грамадзкі парадак).

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG